Otyrar aýdanynda zorlanǵan jetkinshekter sany 15-ke jetti – feık

Túrkistan oblysynyń Otyrar aýdanynda 15 jetkinshektiń zorlanǵany jaıynda taratylǵan aqparat jalǵan. Bul týraly Túrkistan oblysy polıtsııa departamentiniń bastyǵy Murat Qabdenov málimdedi, dep habarlaıdy Kazinform.

Óńirdiń bas polıtseıi shyndyqqa janaspaıtyn aqparat boıynsha áleýmettik jelide jazba jarııalady.

«Túrkistan oblysy polıtsııa departamentine 2023 jyly 19 qazanǵa deıin 3 azamat aryzdanǵan. Eshqandaı 15 derek nemese 15 aryz, 15 jábirlenýshi degen joq. Sonymen qatar basqa da jábirlenýshilerdi anyqtaý maqsatynda jedel-tergeý is-sharalaryn jalǵastyrýdamyz», - dep jazdy Murat Qabdenov Facebook-tegi paraqshasynda.

Sondaı-aq, Túrkistan oblysynyń polıtsııa departamenti jalǵan aqparat taratýshylardy QR QK-niń 274-babymen jaýapkershilikke tartý qarastyrylǵany týraly eskertý jasady.

Aıta keteıik, keshe Túrkistan oblysynyń 33 jastaǵy turǵyny kámeletke tolmaǵan qyzdardy zorlady degen kúdikke ilinip, qamaýǵa alynǵan bolatyn.