Otyrar aýdanynda jańa jumys oryndaryn ashý baǵytynda jumystar kúsheıtiledi
TÚRKІSTAN. KAZINFORM - Túrkistan oblysynyń ákimi Darhan Satybaldynyń ashyq dıalog alanyńda oblys turǵyndarmen kezdesýi jalǵasyp jatyr. Onda óńir máseleleri turǵyndarmen birge kóterilip, sheshý joldary qarastyrylýda.
Túrkistan oblysy ákiminiń kezekti halyqpen kezdesýi Otyrar aýdanynda ótti. Kezdesý barysynda oblysty damytý baǵytynda atqarylǵan jumystar baıandalyp, turǵyndardyń suraqtaryna jaýap berildi. Máseleler ashyq aıtylyp, ótkir suraqtar qoıyldy.
«Memleket basshysy jańa ekonomıkalyq úlgige ótý boıynsha naqty tapsyrmalar bergen bolatyn. Onyń bastysy — ınvestıtsııa tartý, ıaǵnı jańa kásiporyndar men jumys oryndaryn ashý. Agroónerkásip keshenin damytý jáne sý resýrstaryn únemdi paıdalaný maqsatynda sý únemdeıtin tehnologııalardy keńinen paıdalaný. Aýyldyq jerlerdi damytý maqsatynda „Aýyl — El besigi“ jobasy aıasynda Otyrar aýdanynda ótken jyly 10 eldi mekende 15 jobany iske asyrýǵa 1,1 mlrd teńge bólindi. Atap aıtqanda, aýdandaǵy Arys, Shoımanov, Kókmardan, Shytty eldi mekenderin tabıǵı gazben qamtamasyz etý jumystary júrgizildi. Aqtóbe, Shoımanov eldi mekenderinde mádenıet úıiniń qurylys jumystary bastalyp, bıyl paıdalanýǵa tapsyrylady. Sonymen qatar 8 eldi mekendegi 19,3 shaqyrymdy quraıtyn 12 kóshege ortasha jóndeý jumystary júrgizildi. Bıyl 8 eldi mekende 9 joba iske asyrylady. Aýyl turǵyndarynyń tabysyn arttyrý, ál-aýqatyn jaqsartý maqsatynda 2023 jyly „Aýyl amanaty“ baǵdarlamasymen 770 mln teńgege 139 joba qarjylandyryldy. Bunyń kóbi bıýdjet esebinen júrgizilip jatqan jumystar. Aýdannyń ózindik kirisin kóbeıtý, jańa jumys oryndaryn ashý baǵytynda isti shıratqan jón. Bıyl alty aıda aýyl sharýashylyǵy, qurylys, ınvestıtsııa tartý boıynsha ındıkatorlar tómen deńgeıde oryndalýda. Jumysty kúsheıtý kerek. Aýyl ınfraqurylymyn jaqsartý, turǵyndardy jumyspen qamtý baǵytyndaǵy jumystar toqtamaıdy», — degen Darhan Amangeldiuly aýdanǵa ınvestıtsııa tartý baǵytyndaǵy ózekti suraqtarǵa da jaýap berdi.
Sý únemdeý tehnologııasyn engizý, maqta klasterin damytý mańyzdy ekenin, birneshe myń turǵyn jumyspen qamtylatynyn atap ótti.
Jıynda Otyrar aýdanynyń ákimi Qaırat Joldybaıdyń aýdan kóleminde atqarylǵan jumystar týraly baıandamasy tyńdaldy.
Aýdanda jalpy óńirlik ónim kólemi 2021 jyldan beri 60 paıyzǵa ósip, 2023 jyly 80 mlrd teńgege jetti. 2023 jyly negizgi kapıtalǵa tartylǵan ınvestıtsııa kólemi 34 mlrd teńgeden asyp, jospar 5,7 mlrd teńgege artyǵymen oryndaldy. Aýyl sharýashylyǵynyń ónim kólemi ótken jyly 41 mlrd teńgeni qurap, jospar 1,7 mlrd teńgege artyǵymen oryndaldy.
Kezdesýde turǵyndar kókeıdegi suraqtaryn qoıyp, jaýaptaryn aldy. Infraqurylym, jer, jaıylym, gazdandyrý, aǵyn sý jáne ózge de máseleler kóterildi. Árbir kóterilgen másele hattamaǵa engizilip, zań sheńberinde tıisti jumystar júrgiziledi.
Kezdesýden keıin Darhan Satybaldy azamattardy jeke qabyldap, máselelerin tyńdady. Kásipkerlikke qoldaý kórsetý, jerdi zańdastyrý, bilim salasy.densaýlyq saqtaý jáne basqa da túıtkilder tarqatyldy. Qozǵalǵan máseleler baqylaýǵa alynyp, tıisti jumys júredi.
Oblys ákimi Darhan Satybaldy Otyrar aýdanyna jumys sapary barysynda áleýmettik mańyzy bar nysandardyń qurylys barysyn pysyqtady.
Aldymen, óńir basshysy Sháýildir aýylynda boı kóterip jatqan 600 oryndyq jaıly mekteptiń qurylys alańynda boldy. Qurylys kompanııasynyń basshysymen kezdesip, jumys barysyn baqylady.
«Jaıly mektep» ulttyq jobasy tikeleı Memleket basshysynyń tapsyrmasymen júzege asyp jatyr. Qurylys sapasy belgilengen standartqa saı bolýy tıis. Biz tek josparlanǵan merzimde sapaly jumys isteýdi talap etemiz. Kedergiler bolsa, der kezinde aıtyńyzdar. Ákimdik tarapynan kómek kórsetiledi. «Jaıly mektep» jobasy arqyly salynyp jatqan mektepterdiń qurylys úlgisin ózge bilim uıalaryna da qoldanýdy qarastyrý qajet», — dedi Darhan Amangeldiuly.
«Samruk-kazyna Construction» AQ tapsyrysymen salynyp jatqan zamanaýı úlgidegi ǵımaratta oqýshylardyń sapaly bilim alýy úshin qolaıly jaǵdaı qarastyrylady. Joba quny — 5,5 mlrd teńge. «Inteqra Construction» JShS qurylys jumystaryn ótken jyldyń maýsym aıynda bastaǵan. Nysandy osy jyldyń qarasha aıyna deıin paıdalanýǵa tapsyrý josparlanyp otyr.
Sonymen qatar aýdanda «Otyrar aýdanynyń qurylys, sáýlet jáne qala qurylysy bólimi» MM-nyń tapsyrysymen aýdanǵa qarasty M.Shoımanov aýylynda 200 oryndyq mádenıet úıi qurylysy júrip jatyr. Qurylys barysyn baqylaǵan oblys ákimi jaýapty tulǵalarǵa jumys barysynda týyndaǵan máselelerdi nazarǵa alýdy tapsyrdy.
Ótken jyldyń tamyz aıynda qurylysy bastalǵan ǵımaratty bıyl tamyz aıynda el ıgiligine paıdalanýǵa berý kózdelip otyr. Jalpy alańy — 858,4 sharshy metr. Qurylys jumystaryn «KDSM» JShS atqarýda.
Óńirde salynyp jatqan áleýmettik nysandardyń qurylys sapasy tikeleı óńir basshysynyń baqylaýynda tur. Onyń ishinde Otyrar aýdanynyń ınfraqurylymyn jaqsartý jumystary jalǵasady.
