Ótip bara jatqan jyl maǵan erekshe qýanysh syılady - E.Ábdihalyqov, gir sportynan Eýropa chempıony, BQO

Gir sportymen shuǵyldanatyn bozbala bıylǵy naýryz aıynda el chempıony atansa, qarashada Latvııanyń Talsı qalasynda ótken Eýropanyń ashyq chempıonatynda top jardy.

-Gir sportymen 7-synyptan bastap aınalysa bastadym, deıdi Eljan. Ol kez­de №38 mektepte oqıtynmyn. Negizi sportqa bala kezden beıimdigim baıqal­dy. 3-5-synyp aralyǵynda taekvondoǵa bardym. Biraq jattyǵýlar keshki 9-dan 11-ge deıin bolatyndyqtan, sharshap júrdim. Sodan qazirgi bapkerim Dosym Seıilhanulyn kezdestirdim. Ol meni kórdi de «Balam, sen gir sportyn tańda, unasa ári qaraı aınalysa beresiń. Túr-tulǵań osy sportqa keledi» dedi. «Kem degende Qazaqstan chempıony bolasyń. Ári qaraı Eýropa, álem chempıonattaryna aparamyn» degeni de talabymdy oıatty. Bapkerim sózinde turdy. Tórt ret Qazaqstan chempıonatyna qatystym, kú­ni keshe Talsı qalasynan Eýropa chem­pıony bolyp oraldym. Bapkerim Dosym Seıilhanuly negizi boksshy. Biraq izdengishtiginiń, jan jaqtylyǵynyń arqasynda gir sportyn keremet meńgergen. «Temirge temirdeı adam kerek» degendi shákirtteriniń sanasyna quıý arqyly bapker retinde úlken tabysqa jetip keledi. Ol kisi balaǵa uryspaıdy, barlyǵyn sabyrmen túsindiredi. «Balam, eń aldymen, jaqsy adam bol, sport degen báribir hobbı, bir kúni ony da tastaısyń. Sol kezde jaqsy adam, maman bolsań, ómirden óz ornyńdy tabasyń», - dep otyrady.

Ómirdegi eń basty jankúıerlerim - naǵashy atam Ǵazez ben ájem Qapııa. Áke-sheshemnen góri solarǵa jaqynmyn. Basqasha aıtqanda, atam men ájemniń balasymyn. Gir kóterem degen­de, árıne, jandary ashyp: «Balam, beliń­di aýyrtyp alma» degendeı aqyldaryn aıtty. Meniń nátıjelerimdi kórgennen keıin maǵan sendi, tolyq qoldady. Ekinshi jankúıerim - ol ózimniń týǵan mektebim. Mektep dırektory Nurly Nyǵmetqyzyna erekshe alǵysymdy aıtqym keledi. Sebebi bizdiń mektepte sportpen aınalysý­ǵa tolyq jaǵdaı bar. Sport zaly ashyq turady, jattyǵý aldynda jáne odan keıin mindetti túrde eden jýylady. Keı mektepterde jýynatyn dýsh bólmesi tek tekseris kelgende ashylatyn bolsa, bizde kez kelgen ýaqytta ashyq. Sodan bolar, bizdiń mekteptiń oqýshylarynyń 40 paıyzy gir sportymen, 40 paıyzy basketbolmen aınalysady. Qalǵan 20 paıyzy sabaqty óte jaqsy oqıdy.

«Úzdiksiz jattyǵýdyń nátıjesinde Latvııadaǵy jarysta 78 keli salmaqta top jardym. Aldaǵy maqsatym - UBT-ǵa myqtap daıyndalý», dedi E.Ábidhalyqov.