Otgontsetseg Galbadrah Eýropa kýbogynda chempıon atandy
ASTANA. QazAqparat - Belarýstyń Mınsk qalasynda dzıýdodan erler men áıelder arasynda ótip jatqan Eýropa kýbogynyń birinshi jarys kúni qazaqstandyq Galbadrah Otgontsetseg el qorjynyna alǵashqy altyn júldeni saldy, dep habarlaıdy QazAqparat.
48 keli salmaq dárejesinde el namysyn qorǵap jatqan Galbadrah jarysty ekinshi aınalymnan bastady. Alǵashqy beldesýinde ol reseılik Lılııa Kıselevany aıqyn basymdyqpen utsa, jartylaı fınalda ázirbaıjandyq qarsylasy Aısha Gýrbanlyny jarys jolynan shyǵardy. Al fınalda reseılik Tatıana Aıakınany qapy qaldyryp, Eýropa kýbogynyń chempıony atandy.
Osy oraıda aıta keteıik, osy salmaqta tatamıge shyqqan taǵy bir otandasymyz Áıgerim Tóreǵojına alǵashqy kezdesýinde osy Tatıanadan jeńilip jarysty erte aıaqtaǵan bolatyn.
Al jarystyń birinshi kúni erler arasynda 66 keli salmaqta Eset Qýanov fınalda reseılik Aram Grıgorıanǵa jol berip, kúmis medal ıelendi.
Esterińizge sala keteıik, osyǵan deıin atalǵan dodaǵa Qazaqstannan 27 dzıýdoshy attanǵanyn jazǵan bolatynbyz.
Búgin, ıaǵnı jarystyń ekinshi kúni erler arasynda 81, 90, 100 jáne +100 kg salmaq dárejelerinde, áıelder arasynda 70, 78 jáne +78 kg salmaqta jeńimpazdar anyqtalady.
