Ótepqalı Quralov: Olımpıada oıyndaryn eń alǵash túrkiler ótkize bastaǵan
ASTANA. QazAqparat - Olımpıada oıyndaryn alǵash ret grekter emes, túrkilerdiń ata-babalary ótkizgen. Qazaqstannyń Eńbek sińirgen bapkeri Ótepqalı Quralov osylaı deıdi. Óz zertteýleriniń nátıjesinde tutas kitap jazyp shyqqan avtor tarıhı dáıekterdi de keltiredi.
«Prototúrkiler jáne antıkalyq oıyndardyń ómirge kelýi» dep atalatyn 135 bettik kitap eýrazııalyq kóshpendilerdiń tarıhyna arnalǵan. Basylym avtory 150-ge jýyq anyqtamany, sózdikter men muraǵat materıaldaryn zertteı kele, Olımpıadalyq oıyndardyń bastamasy bolǵan sporttyq jarystardy alǵash ret ejelgi táńirshil nomadtar ótkizýi múmkin degen toqtamǵa kelgen, dep jazady khabar.kz.
«Olımpıada oıyndary alǵash ret bizdiń dáýirimizge deıingi 776 jyly ótti. Al táńirshildik oıyndar myńdaǵan jyl buryn bolǵan», - deıdi QR Qurmetti sport qaıratkeri, Eńbek sińirgen bapker Ótepqalı Quralov.
Avtordyń pikirinshe, prototúrkiler jabaıy atty úıretken soń, sporttyq jarystar ótkize bastaǵan. Ejelgi kóshpelilerde tek at oıyndarynyń 39 túri bolǵan. Buǵan kúres, asyq pen sadaq atýdy qosyńyz. Kóne oıyndardyń keıbir túrleri qazirgi Olımpıada oıyndarynda da kezdesedi. Sport qaıratkeri Grekııaǵa bul dástúr nomadtarmen birge bardy deıdi.
Ótepqalı Quralov olımpıada alaýy endi Afınyda emes, Astana ne Almatyda jaǵylatynyna senińkiremeıdi. Degenmen eńbeginiń eleýsiz qalmaıtynyna úmitti.
«Olımpıada oıyndaryn túrki-grektik olımpıada oıyndary dep ataýǵa bolady. Sonda quda da tynysh, qudaǵı da tynysh bolady», - deıdi ol.
Tek Halyqaralyq Olımpıada komıtetiniń sheneýnikteri qazaqstandyq avtordyń eńbegimen tanysyp, bastamany qoldaıdy deý qıyn. Quralovtyń kitabynyń taralymy nebary - 3 myń dana.
