Ótemuratov qaı qalalarda tennıs ortalyqtary salynatynyn aıtty
ASTANA. QazAqparat - Búgin QR Tennıs federatsııasynyń qorytyndy eseptik konferentsııasy barysynda federatsııa prezıdenti Bolat Ótemuratov elimizdiń qaı qalalarynda jańa korttar salynatynyn aıtty, dep habarlaıdy QazAqparat.
«Tennıspen aınalysý úshin ınfraqurylym salý boıynsha ózimizge alǵan mindettemeni oryndadyq jáne 2017 jyly elimizdiń barlyq óńirlerindegi korttar sanyn 184-ke jetkizdik. 2018 jyldyń basynda Petropavl qalasynda birinshi tennıs ortalyǵy ashyldy, osylaısha biz búkil Qazaqstandy qamtıtyn bolamyz», - dedi ol.
Onyń aıtýynsha, elimizde tennıs ortalyqtaryn salýdyń ekinshi kezegi bastalady. Aǵymdaǵy jyly Shymkenttegi jumys istep turǵan tennıs ortalyǵynda eki jabyq kort, jattyǵý zaly men qonaq úı paıdalanýǵa beriledi. Osylaısha, bul ortalyq halyqaralyq standarttarǵa sáıkestendiriledi.
«Kelesi jyly Almatyda «Eıs» jańa tennıs ortalyǵyn ashýdy josparlap otyrmyz. Ol jeke ınvestıtsııa esebinen, Tennıs federatsııasynyń tolyqtaı qarjylandyrýmen salynyp jatyr. Sonymen qatar Aqtóbede de taǵy bir tennıs ortalyǵy salynýda. Astanada da 14 korty bar tennıs ortalyǵy salynatyn bolady. Munan bólek, Qaraǵandy, Aqtaý, Taraz qalalarynda qurylys jumystaryn bastaımyz. Qyzylordada jabyq korttar sanyn arttyramyz», - dedi Bolat Ótemuratov.
QR Tennıs federatsııasy prezıdentiniń aıtýynsha, elimizdiń shaǵyn qalalarynda da tennıs ortalyqtaryn ashý kózdelýde. Qazirgi ýaqytta Lsakovsk pen Rýdnyı qalalalarynda salynatyn tennıs ortalyqtarynyń joba qabyldanǵan.
«Taldyqorǵan men Qostanaıda da jańa tennıs ortalyqtaryn múmkindiginshe salý qajet. Al Óskemende jumys istep turǵan ortalyq bazasynda korttar sanyn arttyrý qajet bolady», - dedi ol.
