Ótemaqy: 64 myń adamnyń depozıti 10 mln teńgeden joǵary bolǵan

ASTANA. QazAqparat – Qazaqstannyń depozıtterge kepildik berý qory teńge depozıtterine 10 paıyz ótemaqy alǵan qazaqstandyqtardyń ishinde depozıttegi aqshasy 10 mln teńgeden asatyn qansha adam bolǵany týraly málimet usyndy, dep habarlaıdy QazAqparat tilshisi.

Buǵan deıin Ulttyq bank tóraǵasy Ǵalymjan Pirmatov teńgemen depozıt ustap otyrǵan 2 mln 623 myń salymshydan jalpy somasy 307 mlrd teńge bolatyn ótinim jınalǵanyn aıtqan bolatyn. Qazaqstannyń depozıtterge kepildik berý qory usynǵan málimet boıynsha, 2 615 772 salymshynyń ótinishi qanaǵattandyrylyp, olarǵa tólenetin ótemaqynyń jıyntyq somasy 306 651 873 753,58 teńge bolǵan.

«Ótemaqynyń 50 paıyzy Qarjy mınıstrliginiń, 50 paıyzy Ulyttyk bank esebinen bankerdin shotyna aýdaryldy. Bankter esebinen ótemaqy tólengen joq. Ótemaqy tólengen depozıtterdiń somasy 10 mln tengeden joǵary salymshylardyń sany 64 276 boldy. Bul óz kezeginde ótinishi maquldanǵan salymshylardyń jalpy sanynyń 2,5 paıyzyna teń», - dep jazylǵan qordyń baspasóz qyzmeti usynǵan málimette.