«Otello» tragedııasy qazaq sahnasyna qaıta oraldy
ASTANA. QazAqparat - Ýılıam Shekspırdiń shoqtyǵy bıik shyǵarmalarynyń biri «Otello» tragedııasy qazaq sahnasyna qaıta oraldy, dep habarlaıdy QazAqparat Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń baspasóz qyzmetine silteme jasap.
Premera 11 sáýir kúni 19:00-de «Beıbitshilik jáne kelisim saraıynda» ótedi.
«Otellony» alǵash ret qazaq sahnasyna 1939 jyly Muhtar Áýezov ákelgen bolatyn. Keıinirek, M. Áýezov atyndaǵy qazaq memlekettik akademııalyq teatry bul qoıylymdy 1964 jáne 2014 jyldary sahnalap, repertýardan shyǵarǵan bolatyn. Bul joly jańa «Otello» Qazaqstannyń Halyq artısi, professor Talǵat Temenovtiń rejısserligimen jaryqqa shyqpaq.
Teatrdyń baspasóz qyzmetiniń habarlaýynsha, «Otello» shyǵarmasy Astana qalasynyń 20 jyldyq mereıtoıyna arnalyp otyr.
«Otello» - álemdik ádebıet galereıasyndaǵy kúshti qaharmannyń biri. Ol naǵyz er azamat bola turyp, naqaq jalanyń qarýy men qurbanyna aınaldy. «Otello» qazirgi zamanmen de úndesip jatyr. Spektakldegi negizgi oı adam ishindegi qyzǵanyshtyń, kóńil kúdiginiń kesirinen ajyrasyp tynatyn jas otbasylardyń kóptigin kórsetedi. Jalpy qazaq teatry ónerine Shekspır qajet. Ózimiz búrkenip, óz qazanymyzda qaınaýǵa eshqandaı da quqyǵymyz joq. Sebebi mundaı klassıkalyq shyǵarmalar aktrelerdiń ósýine, ashylýyna úlken múmkindik beredi», - delingen teatr habarlamasynda.
Qoıylymǵa Qallekı teatrynyń úzdik akterleri men kásibı mamandary tartylǵan. Qazaq teatr ónerinde Elýbaı Ómirzaqov, Qapan Badyrov, Sháken Aımanovtar keskindegen Otello beınesin jańa nusqada Qazaqstannyń eńbek sińirgen qaıratkerleri Qýandyq Qystyqbaev pen Syrym Qashqabaev somdamaq. Al senatordyń qyzy Dezdemonanyń rólinde jas aktrısa Aqmaral Tanabaeva oınaıdy.
