«Óte maıly shelpek»: Qoǵamdyq keńeste astanalyq kompanııanyń 70 mln teńgelik jobasy synǵa ushyrady

ASTANA. KAZINFORM — Astana qalasy qoǵamdyq keńesiniń kezekti otyrysynda keńes múshesi Aıajan Óteýova elordadaǵy jol qozǵalysyn uıymdastyrýǵa jaýapty kompanııanyń bıýdjetten surap otyrǵan 70 mln teńgelik jobasyna shúılikti.

— «Jol qozǵalysyn uıymdastyrý ortalyǵy» JShS-ne jol qaýipsizdigin qamtamasyz etý jónindegi usynymdar ázirleý úshin suralyp otyrǵan qarajat somasyna qatysty suraǵym bar. Osyny tarqatyp túsindire alasyzdar ma? Munsha somaǵa qandaı usynym ázirletpekshisizder, qandaı jumys atqarylady? Esterińizde bolsa, bir jarym jyl buryn strategııa ázirleýge 1 mıllıard teńgege jýyq aqsha surap, biz maquldaǵanbyz. Endi taǵy usynym ázirleýge dep qosymsha 70 mln teńge surap otyrsyzdar, — dep surady qoǵamdyq keńes múshesi.

Jobany talqylaý kezinde bul qyzmetkerlerge tólenetin eńbekaqy shyǵyndaryn jabýǵa suralǵan aqsha bolý kerek degen boljam aıtyldy. Biraq Aıajan Óteýova bıýdjetke túzetý engizý jónindegi qujat jobasynda eńbekaqy shyǵynyn óteý týraly bir de bir sóz joq ekenin aıtyp, ol boljamdy teriske shyǵardy.

Qoǵamdyq keńes tóraǵasy Zulfuhar Ǵaıypov «Jol qozǵalysyn uıymdastyrý ortalyǵy» JShS-niń ókilderine bıýdjetten suratylyp otyrǵan qarajat naqty nege jumsalatyny týraly tolyqqandy málimet berýdi júktedi.

— Usynymdar ázirleýge ǵana 70 mln teńge degen óte «maıly shelpek qoı». Qandaı usynym, bilmeımin endi ony… Altyn árippen jazylatyn kitap pa? Kóreıik, — dedi Zulfuhar Ǵaıypov.

Buǵan deıin Astana áýejaıy 15 sáýirden bastap jumys kestesin ózgertetinin jazǵan edik.