Otbasynyń tsıfrlyq kartasy: 700-den astam atyraýlyqqa áleýmettik tólemder rásimdeldi
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń málimetinshe, «Otbasynyń tsıfrlyq kartasy» jobasy iske asyrylyp jatyr.
«Memleket basshysynyń tapsyrmasyna sáıkes, Atyraý oblysynda 1 qyrkúıekte «Otbasynyń tsıfrlyq kartasy» jobasy pılottyq rejımde qoldanysqa engizildi. Bul kartanyń tıimdiligi joǵary ekeni baıqalyp otyr. Óıtkeni, otbasynyń tsıfrlyq kartasy – azamattarǵa áleýmettik mártebesine baılanysty kepildendirilgen memlekettik qoldaýdy alý quqyqtary týraly aqparat beretin elektrondyq jarshy. Osy joba arqyly qyrkúıek aıynan beri 1 540 adamǵa sms-habarlama jiberildi. Sodan keıin 700-den astam adamǵa járdemaqylar men áleýmettik tólemder rásimdeldi», - dedi Azamat Mámbetov.
Onyń aıtýynsha, «Otbasynyń tsıfrlyq kartasy» jobasyna oblystaǵy barlyq otbasy men músheleri týraly derekter engizilgen. Bul derekter otbasy men músheleri mártebesiniń ózgerýine baılanysty jańartylady.
«Eger memlekettik qoldaý sharalaryn alý quqyǵy belgilengen jaǵdaıda, qyzmet kórsetýge kelisim alý úshin qyzmet alýshyǵa sms-habarlama jiberiledi. Kelisim alǵannan keıin avtomatty túrde qyzmet alýshydan ótinish tirkeledi. Sonyń nátıjesinde járdemaqy, áleýmettik tólemder nemese memlekettik qoldaýdyń basqa túrleri taǵaıyndalyp, keıin alýshynyń esep shotyna aýdarylady», - dep málim etti Azamat Mámbetov.
Eske salaıyq, buǵan deıin Atyraý oblysynda «Otbasynyń tsıfrlyq kartasy» pılottyq jobasy iske qosylǵanyn jazǵan edik.
