Otbasynyń tsıfrlyq kartasy: 7 myńnan astam adamǵa qyzmet kórsetildi

ASTANA. QazAqparat - «Otbasynyń tsıfrlyq kartasy» aqparattyq júıesin pılottyq rejımde engizýdiń arqasynda bıyldyń 1 qyrkúıeginen bastap 36 myń adamǵa memlekettik qyzmetter belsendi kórsetilýi úshin SMS joldandy. Bul rette ótinish berýsiz járdemaqy nemese tólem alý múmkindigin 7 myńnan astam adam paıdalandy, dep habarlaıdy QazAqparat.

«Qazirgi ýaqytta Otbasynyń tsıfrlyq kartasy memlekettik qoldaý sharalaryn alýǵa quqyǵy bar qazaqstandyqtarǵa qandaı da bir ótinishtersiz járdemaqylar men áleýmettik tólemderdiń 9 túrin resimdeýge múmkindik beredi. Bul turǵyda júktilikke jáne bosanýǵa qatysty tabysynan aıyrylǵan jaǵdaıda áleýmettik tólem, bala kútimine oraı tabysynan aıyrylǵan jaǵdaıda áleýmettik tólem, jumysynan aıyrylǵan jaǵdaıda áleýmettik tólem, asyraýshysynan aıyrylý boıynsha áleýmettik tólem, múgedektigi bar balany tárbıelep otyrǵan ata-anasyna (qamqorshysyna) járdemaqy, múgedektigi boıynsha járdemaqy, kópbalaly otbasylarǵa beriletin járdemaqy, «Altyn alqa» jáne «Kúmis alqamen» marapattalǵan kópbalaly analarǵa beriletin járdemaqy, ataýly áleýmettik kómek qamtylǵan», - delingen Eńbek jáne halyqty áleýmettik qorǵaý mınıstrligi málimetinde.

Memlekettik qoldaý sharalaryn alýǵa ruqsat belgilengen kezde járdemaqy alýshyǵa 1414 biryńǵaı baılanys ortalyǵynan SMS-habarlama jiberiledi. Habarlama alǵan azamat oǵan kelisimi týraly jaýap berýi kerek. Ótinishti resimdeý jáne áleýmettik járdemaqyny nemese tólemdi bekitý avtomatty rejımde júrgiziledi, sodan keıin aqsha qarajaty alýshynyń bank shotyna aýdarylady.

«Otbasynyń tsıfrlyq kartasy arqyly proaktıvti formattaǵy memlekettik qoldaý 7 myńnan astam azamatqa jkasaldy. Atap aıtqanda, Otbasynyń tsıfrlyq kartasy – bul túrli memlekettik organdardyń málimetterin jınaqtaıtyn, azamattardyń áleýmettik ál-aýqatynyń deńgeıin anyqtaýǵa jáne olarǵa proaktıvti formatta kepildendirilgen memlekettik qoldaý kórsetýge múmkindik beretin aqparattyq júıe. Qazirgiı kezde memlekettik organdardyń aqparattyq júıeleriniń derekteri negizinde Otbasynyń tsıfrlyq kartasynda Qazaqstannyń 19,5 mln azamaty nemese 6,3 mln otbasy týraly aqparat jınaqtalǵan», - dep atalyp ótken vedomstvo habarlamasynda.

Jobany iske asyrý kezeńderi:

- osy jyldyń 1 qyrkúıeginen bastap járdemaqylar men áleýmettik tólemderdiń 9 túri boıynsha jańa formatta qyzmet alýǵa múmkindik berildi;

- 2023 jylǵy 1 qańtardan bastap tizim áleýmettik qorǵaý salasyndaǵy qyzmettermen keńeıtiletin bolady;

- 2024 jylǵy 1 qańtardan bastap densaýlyq saqtaý jáne bilim berý salalaryndaǵy memlekettik kepildikter engiziletin bolady;

- 2025 jyldan bastap memlekettik kepildikterdiń barlyq túrleri qamtylatyn bolady.