Otbasyny damytý men qoldaýdyń jol kartasy jasaldy

ASTANA. QazAqparat - Búgin QR Memlekettik hatshysy Gúlshara Ábdiqalyqovanyń tóraǵalyǵymen QR Prezıdenti janyndaǵy Áıelder isteri jáne otbasy-demografııalyq saıasat jónindegi ulttyq komıssııa otyrysy ótti, dep habarlaıdy QazAqparat tilshisi.

«Elbasy Nursultan Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty bıylǵy Joldaýynda «jastar men otbasy ınstıtýtyn keshendi qoldaý memlekettik saıasattyń basymdyǵyna aınalýy tıis» dep atap ótken. Memleket basshysy jastardyń barlyq sanatyn qoldaýǵa arnalǵan sharalardy qamtıtyn áleýmettik satynyń aýqymdy platformasyn qalyptastyrý kerektigin aıtty.  Sonymen qatar, aldaǵy 2019 jyldy Jastar jyly dep jarııalaýdy usyndy. Atalǵan bastamalar otbasyn damytý men qoldaýǵa, ásirese jastar arasynda otbasylyq qundylyqtardy nyǵaıtýǵa, eldegi jańǵyrý úderisterine barshanyń atsalysýyn qamtamasyz etýge baǵyttalǵan», - dedi otyrysty ashqan Memlekettik hatshy.
 

Osynyń barlyǵy Áıelder isteri jáne otbasy-demografııalyq saıasat jónindegi ulttyq komıssııanyń aýqymdy mindetteriniń biri bolyp sanalatynyn basa aıtqan Gúlshara Ábdiqalyqova jınalǵandardy  komıssııanyń jańa múshesimen de tanystyrdy.

«Qaragóz Asqarqyzy Súleımenova - Qazaqstannyń eńbek sińirgen qaıratkeri. Ol televızııa salasynda balalar, áıelder máselesimen shuǵyldanady», - dep atap ótti ol.

Otyrysta QR Bas prokýratýrasy «Otbasyndaǵy zorlyq-zombylyqsyz Qazaqstan» ilki jobasyn júzege asyrý qorytyndysy týraly aqparat usyndy. Ony iske asyrý barysynda Shymkent qalasy men Túrkistan oblysy ákimdikterinde Otbasy, jastar men balalar isteri jónindegi basqarma ashyldy. Shymkente Medıtsınalyq ońaltý ortalyǵy uıymdastyryldy. Túrkistan oblysynyń 14 aýdanynda jáne Shymkent qalasynda «Halyqty áleýmettik-psıhologııalyq qoldaý» qyzmetteri ashyldy. Onda 865 adamǵa psıhologııalyq kómek kórsetilgen.
 

Munan bólek, QR-daǵy 2030 jylǵa deıingi otbasylyq jáne genderlik saıasat tujyrymdamasyn iske asyrý boıynsha Almaty oblysynyń 2017-2019 jyldarǵa arnalǵan is-sharalar josparynyń oryndalýy týraly aqparat tyńdaldy. Sondaı-aq Qoǵamdyq damý mınıstrliginiń Otbasyny damytý men qoldaýdyń 2019-2024 jyldarǵa arnalǵan jol kartasynyń jobasy tanystyryldy. Jıyn sońynda Memlekettik hatshy Gúlshara Ábdiqalyqova memlekettik organdarǵa birqatar tapsyrma berdi.