«Otbasyndaǵy zorlyq-zombylyqty toqtatamyz» aktsııasy aıasynda 180 myńnan astam aqparattyq materıaldar daıyndaldy - QR ІІM
ASTANA. 31 tamyz. QazAqparat - Іshki ister mınıstrligi múddeli memlekttik organdar, úkimettik emes uıymdar, jurtshylyq jáne buqaralyq aqparat quraldaryn tarta otyryp, aǵymdaǵy jyldyń 22 jáne 27 tamyzy aralyǵynda «Otbasyndaǵy zorlyq-zombylyqty toqtatamyz» aktsııasyn ótkizdi, dep habarlady QR ІІM Ákimshilik polıtsııa komıteti.
Aktsııanyń maqsaty halyq arasynda otbasy-turmystyq qarym-qatynastar salasyndaǵy quqyq buzýshylyqtardyń aldyn alý jáne profılaktıkasy boıynsha quqyq túsindirý jumystaryn, sondaı-aq buqaralyq aqparat quraldary arqyly aqparattandyrý bolyp tabyldy. Aktsııa halyqqa jadynama, búkteme, aqparattyq materıaldar taratý jáne kásiporyndar, uıymdar, mekemelerde dárister men áńgimeler ótkizý úshin utqyr keńes berý toptaryn qurýdy kózdeldi.
Aktsııany ótkizýge 16 myńnan astam adam, onyń ishinde 11 myńnan astam polıtsııa qyzmetkerleri, shamamen myńdaı jergilikti atqarýshy organdardyń, 4 myńnan astam bilim berý, eńbek jáne halyqty áleýmettik qorǵaý, prokýratýra, densaýlyq saqtaý organdarynyń, «NurOtan» HDP jáne úkimettik emes organdardyń ókilderi qatysty. Turmystyq zorlyq-zombylyqqa dýshar bolǵan otbasy múshelerine psıhologııalyq, pedagogıkalyq, quqyqtyq kómek kórsetý maqsatynda, sondaı-aq kásiporyndar, uıymdar, mekemelerde dárister men áńgimeler ótkizý maqsatynda 2 myńnan astam utqyr keńes berý toptary qurylyp, olardyń kúshimen 6 myńnan astam dáris pen 13 myńnan astam áńgime ótkizildi.
Aktsııa barysynda 180 myńnan astam aqparattyq materıaldar (búktemeler, plakattar, bılbordtar, stendter, broshıýralar) ázirlenip, olar turǵyn úılerdiń kire beristerine, dúkender, sýpermarketter, bazarlar, adamdardyń kóp jınalatyn jáne jappaı demalys oryndary, memlekettik mekemelerge ornalastyryldy. Buqaralyq aqparat quraldarynda 800-deı sóz sóıleýler, telearnalarda 200-den, basylymdarda 500-den, ınternet-saıttarda 100-den astam materıaldar jarııalandy.
Іshki ister organdarynyń áıelderdi zorlyq-zombylyqtan qorǵaý bólinisteriniń qyzmetkerleri jer-jerlerde aktsııany tıimdi ótkizýdi uıymdastyrý jumystaryn júrgizdi. Qostanaı, Aqmola, Shyǵys Qazaqstan, Pavlodar oblystarynyń ÁZZQB qyzmetkerleri aktsııany ótkizýde belsindilik tanytty.
