Otbasyndaǵy zorlyq-zombylyqqa qatysty shaǵymdar úsh ese ósti

ASTANA. QazAqparat – Keıingi bes jylda otbasyndaǵy zorlyq-zombylyq derekteri boıynsha shaǵym úsh ese ósti. Bul týraly elordada ótken brıfıngide QR ІІM Ákimshilik polıtsııa komıteti tóraǵasynyń orynbasary Renat Zulqaıyrov aıtty, dep habarlaıdy QazAqparati.

«Sonymen qatar, bul oqıǵalardyń 60 paıyzy boıynsha polıtseıler tıisti áreket jasaı almady. Sebebi zardap shekken adamdar kóp jaǵdaıda aryz berýden bas tartyp jatady. Sondyqtan aryz bolmasa, zańnamaǵa sáıkes polıtseı otbasynyń shyrqyn buzatyn adamdardy jaýapqa tarta almaıdy. Tıisti jazasyn almaǵan bul adamdar turmystaǵy zorlyq-zombylyqty ádetke aınaldyryp alady», - dedi R. Zulqaıyrov.

Onyń aıtýynsha, bıyldyń ózinde otbasyndaǵy zorlyq-zombylyq saldaryn 18 adamnyń ómiri qıyldy.

Sonymen qatar ol Іshki ister mınıstrligi tıisti memlekettik organdarmen zańnamada atalǵan qylmystar úshin jaýapkershilikti kúsheıtý qadamdaryn pysyqtap, zańnamalyq ózgeristerdi daıarlaǵanyn jetkizdi.

Bul turǵyda otbasynda janjal shyǵaratyn adamdardy jaýapqa tartý, ákimshilik ári qylmystyq jaýapkershilikti kúsheıtý eskerilgen.