Otbasyndaǵy tatýlyq: Karantınde urys-keris bolmas úshin ne isteý kerek
NUR-SULTAN. QazAqparat - Karantın kezinde erli-zaıyptylardyń qorqynyshqa boı aldyryp, ajyrasyp ketýiniń qalaı aldyn alýǵa bolady? Bul saýalǵa psıhoanalıtık Janar Ospanova jaýap berdi, dep habarlaıdy QazAqparat tilshisi.
«Karantın kezinde erli-zaıyptylardyń birge bolýy ózderi úshin paıdaly dep oılaımyn. Osyndaı kezde adamdar bir-birin jaqynyraq tanıdy. Mysaly, jubaıyna kóńil bólýge ýaqyt tappaı júrgenin aıtyp shaǵymdanatyndar bar. Sondaı adamdar úshin jaqynyna kóńil bólip, qamqorlyq tanytatyn ýaqyt keldi. Osyndaı kezde jıi ursysyp qalatyn jubaılar da bar shyǵar. Ondaı kezde ursysyp otyrǵan ómirlik serigińiz ómirden ótip ketse, ózińdi qalaı sezinetinińdi kóz aldyna elestetip kórińiz. Urys-keris kezinde ózińdi ustap, agressııaǵa jol bermeý kerek. Psıhologııada úsh mınýt únsiz qalý degen tehnıka bar. Úsh mınýt únsiz qala alsańyz úsh saǵat, úsh saǵat únsiz bola alsańyz, úsh kún úndemeı júre alasyz. Únsiz qalǵan adam ashý-yzasynyń esh maǵynasy bolmaǵanyn túsinedi. Dál qazirgi karantın jaǵdaıynda bir-birińe túsinistik tanytyp, birlikte bolý kerek», - deıdi Janar Ospanova.
Onyń aıtýynsha, urys-keristi azaıtý úshin bala-shaǵaǵa kóp kóńil bólý kerek.
«Qazir balalar da úıde. Olarǵa kóńil bólip, oınap, damýyna kómektesý kerek. Al ózińiz zerigip ketpes úshin kitap oqýǵa bolady. Uıaly telefonda kóp otyrý adamdy tez sharshatady, sondyqtan 20 mınýt saıyn odan demalý kerek. Sondaı-aq, ıogamen, dene shynyqtyrýmen, sýret salyp, keste tigýmen jáne ártúrli dámdi tamaq pisirýmen aınalysýǵa bolady. Óziniń psıhologııalyq jaǵdaıyn basqara almaıtyn adam psıholog arqyly boıyndaǵy úreı, qorqynyshynan aryla alady», - deıdi psıhoanalıtık.
