Otbasynda zorlyq kórgen elordalyq 320 áıel kómekke júgingen

NUR-SULTAN. QazAqparat – Bıylǵy toǵyz aıda elordada 320-dan astam áıel zorlyq-zombylyqtan qorǵaý tobynyń ınspektorlaryna kómekke júgingen. Bul týraly Áıelderdi zorlyq-zombylyqtan qorǵaý tobynyń aǵa ınspektory Gúlmıra Shyrahmetova búgin baspasóz konferentsııada aıtty, dep habarlaıdy QazAqparat tilshisi.

«2020 jyldyń toǵyz aıynda 320-dan astam áıel bizdiń kómegimizge júgindi. 160-qa jýyq áıel Áıelderdi zorlyq-zombylyqtan qorǵaý tobynyń jeke qabyldaýynda boldy. Bala-shaǵaly 39 áıel Daǵdarys ortalyǵyna ornalastyryldy. Olardyń ótinishteri boıynsha 93 quqyq buzýshy ákimshilik jaýapkershilikke tartylyp, 127 qorǵaý nusqamasy shyǵaryldy. 47 áıelge azamattyq-quqyqtyq qatynastarda kómek kórsetilip, 89 adam májbúrlep emdeý mekemelerine ornalastyryldy. Olardyń keıbireýi balalarymen birge Daǵdarys ortalyqtaryna ornalastyryldy. Al keıbireýine úkimettik emes uıymdardyń ókilderimen birge kómek kórsetildi», - deıdi Gúlmıra Shyrahmetova.

Inspektorlar turmystyq zorlyq-zombylyq qurbany bolǵan áıelderge máselelerin sheshýge, jumys tabýǵa, keıde qujattaryn qalpyna keltirýge kómektesedi.

«Adam quqyǵy jáne zańdylyqty saqtaý jónindegi Qazaqstandyq bıýro Ýkraınadan Keńes Odaǵy kezeńinde kelgen áıeldiń qujattaryn qalpyna keltirdi. Buǵan deıin onyń eshbir qujaty bolmaǵan. Tıisinshe, áıeldiń balalarynda da eshbir qujat bolmaǵan. Qujattardy qalpyna keltirgennen keıin ol balalaryna áleýmettik tólemder ala bastady jáne jumysqa ornalasyp, baspanaly boldy. Mundaı mysaldardy kóptep keltirýge bolady», - deıdi aǵa ınspektor.

Onyń aıtýynsha, áıelder ınspektorlarǵa ártúrli máselemen júginedi.

«Biz úılestirýshi organ retinde úkimettik emes uıymdarǵa habarlasyp, olarǵa kómektesemiz. Kóptegen áıel kúıeýlerimen de jumys jasaǵanymyzdy qalaıdy. Azamattyq bastamalardy qoldaý ortalyǵy bar. Olar qazir 12 otbasymen jumys isteýde. Bul otbasylarǵa qıyndyqtardy jeńýge jáne otbasydaǵy qarym-qatynasty retteýge kómektesedi», - deıdi Gúlmıra Shyrahmetova.

Inspektordyń sózinshe, otbasylyq daý-damaıda erli-zaıyptynyń bireýi ǵana kináli bolýy múmkin emes.

«Biz otbasyny barynsha saqtap qalýǵa tyrysamyz. Al otbasyn saqtap qalý múmkin emes jaǵdaı bolsa – onda áńgime basqasha, árıne. Turmystyq zorlyq-zombylyq kóp jaǵdaıda ishimdik ishken kúıde bolady jáne qol kóterýge de kóp jaǵdaıda qyzǵanysh sebep bolady», - deıdi ol.

Eske salaıyq, elimizde turmystyq zorlyq-zombylyq qurbany bolǵan áıelder úshin 1409, al jynystyq zorlyq-zombylyq qurbandary úshin [phone] jáne 150 nómiri boıynsha baılanys ortalyqtary jumys isteıdi. Bul senim telefondary arqyly quqyqtyq jáne psıhologııalyq keńes alýǵa bolady.