Otbasynda janjal shyǵarǵandar úıine ýaqytsha kirgizilmeýi múmkin
NUR-SULTAN. QazAqparat – Parlament Májilisiniń jalpy otyrysynda palata depýtattary «Otbasylyq-turmystyq zorlyq-zombylyqqa qarsy is-qımyl týraly» zań jobasyn jumysqa aldy, dep habarlaıdy QazAqparat tilshisi.
«Atalǵan zań jobasy Parlament depýtattary bastamasymen usynylyp otyr. Búgingi tańda otbasylyq-turmystyq ortada quqyq buzatyndardyń jaýapkershiligin qataıtýǵa qatysty tıisti sharalar qabyldanyp jatqanyna qaramastan, bul másele ózekti kúıinde qalyp otyr. Osyǵan baılanysty ázirlengen zań jobasynda otbasyndaǵy zorlyq-zombylyqtyń alý máselesine aıryqsha nazar aýdaryldy. Osy oraıda, zańnamanyń maqsattary men mindetteri jáne qaǵıdattary kúsheıtildi», - dedi Májilistiń Áleýmettik-mádenı damý komıtetiniń tóraǵasy Gúlshara Ábdiqalyqova.
Onyń sózine qaraǵanda, qujat aıasynda ókiletti memlekettik organdardyń quzyreti naqtylandy. Otbasylyq-turmystyq zorlyq-zombylyqtan zardap shekkenderdi qorǵaý jáne olarǵa qaýipsizdik sharalaryn qamtamasyz etý boıynsha normalar engizildi.
«Sonymen birge, otbasynda janjal shyǵarýshylardyń minez-qulqyn psıhologııalyq ádistermen túzeýdiń, qoǵamdyq baqylaý ınstıtýtyn engizýdiń tetikteri qarastyrylýda. Buǵan qosa, polıtsııanyń zorlyq-zombylyqtyń kez kelgen faktisine jedel áreket etý boıynsha jaýapkershiligi kúsheıtilýi, sondaı-aq qaıǵyly jaǵdaılardyń oryn alýyn boldyrmaý úshin otbasynda óktemdik jasaýshyny turǵyn úıden ýaqytsha shyǵarý jónindegi norma kózdeldi. Komıtet zań jobasymen jumys isteýge jáne 2020 jylǵy 23 qyrkúıekke deıin qorytyndy ázirleýge daıyn», - dedi G. Ábdiqalyqova.
Sonymen qatar, palata depýtattary «Qazaqstan Respýblıkasynyń keıbir zańnamalyq aktilerine otbasylyq-turmystyq zorlyq-zombylyqqa qarsy is-qımyl máseleleri boıynsha ózgerister men tolyqtyrýlar engizý týraly» ilespe zań jobasyn jumysqa aldy.
