Otbasynda janjal shyǵarǵan atyraýlyq úıin órtep, qashyp ketti

ATYRAÝ. QazAqparat – Atyraýda otbasynda janjal shyǵarǵan er adam mas kúıde úıin órtep, qashyp ketken. Qazir ol izdestirilip jatyr, dep habarlaıdy QazAqparat.

Oblystyq polıtsııa departamentiniń baspasóz qyzmetinen málim etkendeı, oqıǵa 22 jeltoqsanda bolǵan.

«Polıtsııa departamentinń 102 arnasyna jergilikti ýaqytpen saǵat 21:12 shamasynda 1992 jylǵy áıelden shaǵym túsken. Mas kúıde úıdiń esigin buzyp kirgen kúıeýi ony úshkir zatpen qorqytqan. Oqıǵa ornyna «Batys-58» ekıpajynyń polıtseıleri úıdiń ishinen tútin shyǵyp jatqanyn baıqaǵan. Jedel túrde áreket etken polıtseıler 30 jastaǵy áıel men 4 jasar balany qaýipsiz jerge shyǵaryp, órtti sóndirgen», -dep habarlady departamenttiń baspasóz qyzmeti.

Al, mas kúıde áıelin qorqytyp, úıin órtegen er adam polıtsııa qyzmetkerleri kelgenshe oqıǵa ornynan qashyp ketken. Qazir polıtsııa qyzmetkerleri atalǵan derekke qatysty 1992 jylǵy áıel men onyń 4 jasar qyzyn «Analar úıine» ornalastyrǵan.

Úıin órtegen er adamdy jedel-izdestirý jumystary júrgizilip jatyr.

Eske sala ketelik, buǵan deıin Otbasynda janjal shyǵarǵan 2 myńnan astam atyraýlyq jaýapqa tartylǵanyn habarlaǵan bolatynbyz.

Bıylǵy 11 aıda otbasynda janjal shyǵarǵandarǵa qatysty 6 939 derek tirkelgen. Atalǵan derekke baılanysty 2 074 adam QR Ákimshilik quqyq buzýshylyq týraly kodeksiniń 73-babyna sáıkes (Otbasy-turmystyq qatynastar aıasyndaǵy quqyqqa qarsy áreketter) jaýapkershilikke tartylǵan. Al, 2 670 adamǵa qatysty qorǵaý nusqamasy shyǵarylyp, 504 adamǵa erekshe talaptar qoıylǵan.