Otbasynda, mektepte, basqa da áleýmettik ınstıtýttarda lıderlik qasıetterdiń qalyptasýy týraly ǵylymı joba júzege asýda
ASTANA. 26 qarasha. QazAqparat - Búgin Qazaqstan Respýblıkasy Tuńǵysh Prezıdenti Murajaıynda «Kóshbasshylyq jáne tulǵa» atty halyqaralyq ǵylymı-tájirıbelik semınary barysynda «Otbasynda, mektepte jáne basqa da áleýmettik ınstıtýttarda lıderlik qasıetterdiń qalyptasýy» atty ǵylymı jobanyń júzege asý barysy talqylandy.
Ǵylymı jobanyń maqsaty lıderlik fenomeni men áleýmettik toptyń tulǵany qalyptastyrýǵa yqpalyn zertteý bolyp tabylady. Zertteýlerde aıqyndalǵandaı, kóshbasshylyq qasıetter alǵash ret otbasynda qalyptasyp, odan ári qaraı damýy áleýmettik ınstıtýttarda jalǵasyn tabady.
«Búgingi semınar aıasynda bizdiń áriptester ǵylymı joba týrasynda óz paıymdaryn ortaǵa salatyn bolady. Olardyń arasynda Ázirbaıjan, Ýkraına elshiliginiń ókilderi bar. Nege osy memleketterden ókilder shaqyryldy, degenge kelsek biz buǵan deıin Ázirbaıjannyń tuńǵysh prezıdentiniń 85 jyldyǵy aıasynda birlesken jobalarǵa atsalysqan bolatynbyz. Kelesi jyly G. Álıevtyń 90 jyldyǵyna da kórme uıymdastyrýdy josparlaımyz. Al Ýkraınanyń Qazaqstanmen dostyǵy óz aldyna, Tuńǵysh Prezıdentimizdiń ómirbaıanynda bul el de erekshe orynda tur», - deıdi Tuńǵysh Prezıdent Murajaıy dırektorynyń orynbasary Botagóz Qaıypova.
Onyń aıtýynsha, atalǵan ǵylymı jobanyń júzege asyp jatqanyna 3 jyldan astam ýaqyt boldy. «Shaǵyn izdenis jumystary memleket basshysynyń týǵan jerinde bastaldy, qazir ol keń aýqymmen júzege asa bastady. 2013-2015 jyldary aralyǵynda da tulǵanyń áleýmettenýi jobasy aıasynda da jalǵastyratyn bolamyz. Meniń oıymsha, ǵylymı jobanyń logıkalyq-teorııalyq nátıjeleri ǵana emes, ádistemelik jalǵastyrý sharalary da mańyzdy», - dedi ol.
