Otbasyn qoldaý ortalyqtaryna 90 myńnan astam adam júgindi
Darhan Qydyráliniń atap ótýinshe, salalyq vedomstvo retinde mınıstrlik turmystyq zorlyq-zombylyqtyń aldyn alý máselesine qatysty úsh baǵyt boıynsha jumys júrgizip otyr.
«Birinshiden, jyl saıyn otbasylyq saıasat salasynda tereńdetilgen taldamalyq jáne áleýmettaný zertteýleri júrgiziledi. Ulttyq baıandamalar ázirlenip, memlekettik organdar men múddeli uıymdar úshin usynymdar jarııalanady. 2021 jylǵy áleýmettaný zertteýlerinde respondentter otbasyndaǵy zorlyq-zombylyqtyń negizgi sebebi retinde áleýmettik-ekonomıkalyq sıpattaǵy problemalyq máselelerdi atap ótti. Olar: jumyssyzdyq – 55,9 paıyz, maskúnemdik, nashaqorlyq sııaqty zııandy ádetter – 52,8 paıyz jáne otbasyndaǵy moraldyq-psıhologııalyq, fızıkalyq zorlyq-zombylyq – 25 paıyz», - dedi ol.
Onyń atap ótýinshe, ekinshiden aqparattyq tapsyrys aıasynda respýblıkalyq jáne óńirlik BAQ-ta 2022 jyly qańtardan bastap «Otbasy ınstıtýtyn nyǵaıtý» taqyrybynda 4 042 materıal, sonyń ishinde telearnalar efırinde – 990 sıýjet, baspa BAQ betterinde – 1 699, ınternet-resýrstarda 1 353 materıal jarııalandy.
«Úshinshiden, 2030 jylǵa deıingi otbasylyq jáne genderlik saıasat tujyrymdamasyn iske asyrý is-qımyl josparyna sáıkes, «Amanat» partııasynyń 2025 jylǵa deıingi saılaýaldy baǵdarlamasy jol kartasy boıynsha jergilikti atqarýshy organdarmen birlesip, otbasyn qoldaý ortalyqtaryn qurý jónindegi jumysty úılestirý jolǵa qoıyldy. Qazir óńirlerde 46 otbasyn qoldaý ortalyǵy jumys isteıdi. Onyń 36-sy halyqty áleýmettik qorǵaý basqarmalary janynan ashylǵan. Barlyq ortalyqtar jergilikti bıýdjet esebinen qarjylandyrylady», - dedi Darhan Qydyráli.
Mınıstrdiń dereginshe, ortalyqtar psıhologııalyq, áleýmettik jáne zańgerlik kómek kórsetedi, otbasy ınstıtýtyn nyǵaıtý, jan-jaqty qoldaý sharalary boıynsha keńes beredi.
«Jyl basynan bastap ortalyqtardyń qyzmetine 90 myńnan astam adam júgingen. Osy oraıda, «Mereıli otbasy» sııaqty respýblıkalyq is-sharalar uıymdastyrylady», - dedi ol.
