Otbasymmen eshbir saılaýdan tys qalǵan emespin – Daýys bergen almatylyq qarııa

ALMATY. QazAqparat -Almatyda Parlament Májilisi men qalalyq máslıhat depýtattyǵyna úmitkerlerge daýys berý bastaldy. Búgin qaladaǵy ýchaskeler ashylmaı jatyp, óz tańdaýyn jasaýǵa kelgen almatylyqtar qarasy qalyń boldy, dep habarlaıdy QazAqparat tilshisi.

Almatyda alǵashqy saılaý ýchaskesi tańǵy saǵat 6.00-de ashyldy. Al daýys berý saılaý zańnamasynda bekitilgen tártip boıynsha saǵat 7.00-de bastaldy.

Elimizdiń mańyzdy oqıǵasynan shet qalmaı, óz tańdaýyn jasaýǵa kelgen qala turǵyndarynyń kóńil-kúıi kóterińki. Saılaý ýchaskesine jınalǵandardyń kóbisi bala-shaǵasyn erte kelgen. Solardyń biri Janserik Begimjanov.

«Menim jasym 65-te. Osy ýaqytqa deıin eshqandaı saıası naýqannan tys qalǵan emespin. Bala-shaǵammen kelip, daýys berý otbasylyq dástúrge aınaldy. Árıne árqaısymyz óz tańdaýymyzdy jasadyq», - deıdi Janserik Begimjanov.

№ 373 ýchaskesiniń jetekshisi Aınur Nurpeıisovanyń aıtýynsha, saılashýlarǵa barlyq jaǵdaı jasalǵan.

«Bizdiń saılaý ýchaskesinde 2044 adam tirkelgen. Almatylyqtar belsendi atsalysýda. Bes baqylaýshy jumys istep jatyr. Kelgen saılaýshylardyń dene qyzýyn tekserip, barlyq sanıtarlyq normalardy saqtaýyn qatań qadaǵalaımyz», - deıdi Aınur Nurpeısova.

Megapolıste 500-den astam saılaý ýchaskesi jumys istep jatyr. Onda 1014 baıqaýshy saılaýdyń ádil ótýin baqylaýda.