Otbasym Kıprden oralyp, balalarym Qazaqstandaǵy qatardaǵy mektepke barady – Saıasat Nurbek

NUR-SULTAN. QazAqparat – Ótken aptada ǵana QR Ǵylym jáne joǵary bilim mınıstri laýazymyna taǵaıyndalǵan Saıasat Nurbek balalaryn nege shetelde oqytqanyn túsindirdi, dep habarlaıdy QazAqparat tilshisi.

«Sizdiń balalaryńyz Kıprde oqyp jatyr. Nege osy ýaqyt boıy balalaryńyz shetelde oqydy? Olardyń Qazaqstanǵa oralatyn jospary bar ma? Kelse, qandaı mektepke barady?» dep suraq qoıdy tilshiler mınıstrge Úkimet kýlýarynda.

«Onyń úsh sebebi bar, eń aldymen jubaıymnyń densaýlyǵynda kinárat bar, oǵan naqty medıtsınalyq usynym da bar. Ekinshiden, balalarymdy Qazaqstandaǵy jeke mektepterde oqytýǵa qarajatym jetpedi, úshinshiden, Kıprde brıtandyq formattaǵy jaqsy aǵylshyn mektebi boldy. Biraq ýaıymdamańyzdar, 26 maýsym kúni balalarym Qazaqstanǵa ushyp keledi, sizderge fotoesep jiberemin», - dep jaýap berdi Saıasat Nurbek.

Sonymen birge, tilshiler «mınıstr atanǵan soń balalardy elge qaıtarýdy uıǵardyńyz ba?» degen suraq qoıdy.

«Meniń mınıstr bolǵanyma bir-aq kún boldy. Bul aralyqta birdeńeni ózgertý múmkin emes. Bul sheshimdi jyl basynda qabyldaǵanbyz. Balalarym Qazaqstandaǵy qatardaǵy mektepke barady», - dedi Ǵylym mınıstri.

Sonymen birge, Saıasat Nurbek dinı nanym-senimi týraly suraqqa jaýap berdi.

«Qudaıǵa shúkir, musylmanmyn. Salafızmge eshqandaı qatysym joq. Bilesizder, atam men ájemniń qolynda óstim. Atam Nurbek Semeı qalasynda Tynybaı meshitinde ımam bolǵan. Sondyqtan kishkentaı kezimnen ıslam dinine jaqyn adammyn. Biraq eshqandaı radıkaldy aǵymdar, sektalar, salafızmge qatysym joq. Ony ashyq aıtýǵa bolady», - dedi mınıstr.

Aıta keteıik, búgin Úkimet otyrysynda QR Ǵylym jáne joǵary bilim mınıstri laýazymyna taǵaıyndalǵan Saıasat Nurbek saltanatty túrde ant berdi.