#Otbasym: Qazaqstandyqtar januıasymen túsken jarqyn sýretterin jarııalap, fleshmobqa qatysa alady
«Qurmetti dostar!
15 mamyr – Halyqaralyq Otbasy kúni. Keleshekte bul datanyń qazaqstandyqtar úshin de mańyzdy merekege aınalaryna senim bildiremin.
Baqytty otbasy – tabysty memlekettiń ózegi. Áleýmettik zertteýler nátıjelerine sensek bizdiń otandastarymyzdyń deni otbasyn – eń basty qundylyq sanaıdy eken. Dese de, bul salada retteýdi qajet etetin problemalar joq emes: otbasynda bolatyn turmystyq zorlyq-zombylyq, sanaly ata-ana men otbasy tárbıesindegi ákeniń róli, kóp balaly otbasylardyń ál-aýqatynyń tómendigi t.b.
Jalpy otbasy saıasatyna qatysty máseleniń barlyǵy Prezıdent Qasym-Jomart Kemelulynyń únemi nazarynda. Memleket basshysynyń tapsyrmasy boıynsha 2022 jyly «2030 jylǵa deıingi otbasylyq jáne genderlik saıasat tujyrymdamasy» qaıta pysyqtalǵan edi. Onyń negizinde memleket jáne qoǵamdyq ınstıtýttar tarapynan otbasylardyń ál-aýqatyn arttyrý boıynsha keshendi sharalar qabyldanyp jatyr.
Ózderińizge málim, Memleket basshysy «Tolyq adam» tujyrymdamasyn únemi aıtyp júredi. Bul degenimiz birinshi kezekte – aǵa býynnyń aqyl-keńesi men jıǵan tájirıbesin boıǵa sińire otyryp, jańa bilim alýǵa qulshynysty jańa zaman adamy. Al mundaı jan-jaqty tolyqqandy tulǵany baqytty, tárbıeli, mahabbat bılik qurǵan tolyq otbasy ǵana tárbıeleı alady. Sondyqtan otbasy qundylyqtarynyń alǵa ozyp, ál-aýqattyń ósýi qaı kezde de memleket úshin de, qoǵam úshin de mańyzdy mindet bolyp qala beredi», dep jazdy Ulttyq komıssııa tóraǵasy.
Osy oraıda ol QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa áleýmettik jelilerde otbasy qundylyqtaryn dáripteý boıynsha arnaıy fleshmob usynatynyn málim etti.
«Elimizdiń barlyq azamattaryn osy bastamany qoldaýǵa, otbasy qundylyǵyn birige nasıhattap, qorǵaýǵa shaqyramyn. Oǵan qatysý úshin túrli áleýmettik platformalarda «#Otbasym» heshtegin belgileı otyryp, otbasylyq tárbıe, onyń mańyzy, januıa múshelerimen túsken jarqyn sýretter, basqalarǵa úlgi qylyp kórsetýge turarlyq taǵlymdy jaıttar men qyzyqty oqıǵalarmen tipti, árbir azamattyń óziniń úlgili otbasyn keleshekte qalaı kórgisi keletini týraly asyl armandarymen bólisýge bolady. Osylaısha, biz otbasy qundylyǵyn nasıhattaýǵa shaǵyn da bolsa mańyzdy úlesimizdi qosa alamyz. 15 mamyr – Halyqaralyq Otbasy kúninde bizdi qansha qazaqstandyq qoldap, «#Otbasy» heshteginiń qanshalyqty keń taraǵanyn kóre alamyz»,-dedi Aıda Balaeva.
