Otbasym bokstan ketkenimdi qalaıdy - Golovkın
ASTANA. QazAqparat - WBA (Super), WBC, IBF jáne IBO tujyrymdary boıynsha álem chempıony Gennadıı Golovkın AQSh-tyń «Power 106» radıosyna suhbat berdi, dep habarlaıdy QazAqparat tilshisi.
Golovkın aldaǵy Saýl Alvareske qarsy jekpe-jekte bolatyn negizgi qıyndyqqa toqtaldy. Onyń aıtýynsha, basty qıyndyq ol - jas aıyrmashylyǵy. «Menińshe, negizgi qıyndyq sol. Sóz joq, orta dıvızıonda meniń tájirıbem myqty. Al «Kanelo» menen jas. Ekeýimiz de osyny jaqsy túsinemiz. Aldaǵy jekpe-jekte jeńgen adam «pound-for-pound»-ta, jalpy álem boıynsha №1-shi boksshy atanady. Menińshe, eki jaqtyń múmkindigi 50 de 50», - deıdi Golovkın.
Boksshynyń sózine qaraǵanda, sporttyq mansapty aıaqtaýǵa áli erte. Alaıda otbasy músheleri onyń bokstan ketkenin qalaıdy. «Meniń otbasym árbir jekpe-jekten keıin bokstan qashan ketetinimdi suraıdy. Áıelim «boksty aıaqtaıtyn kez keldi ǵoı» deıdi. Men bolsam, sharýama aralaspaýyn suraımyn. Ol - meniń jumysym, meniń sharýam», - dep atap kórsetti GGG.
