Otbasylyq zorlyq-zombylyq qurbandary aryz túsirmese de, ákimshilik is qozǵalady – ІІM

ASTANA. QazAqparat – Otbasylyq zorlyq-zombylyqpen kúresý maqsatynda Іshki ister mınıstrligi Ákimshilik quqyqbuzýshylyq týraly kodekske ózgeris engizedi. Muny OKQ-de ótken brıfıngide Ákimshilik polıtsııa komıteti tóraǵasynyń orynbasary Renat Zulqaıyrov málimdedi, dep habarlaıdy QazAqparat tilshisi.

«2022 jyldyń qyrkúıeginde Memleket basshysy Qazaqstan halqyna Joldaýynda turmystyq zorlyq-zombylyq úshin jaýapkershilikti qatańdatý jóninde tapsyrma berdi. Ony oryndaý úshin mınıstrlik quqyq qoldaný praktıkasy men halyqaralyq tájirıbege júrgizilgen taldaý negizinde tıisti zańnamalyq ózgerister ázirledi», - dep málim etti Renat Zulqaıyrov

Onyń aıtýynsha, jábirlenýshiler polıtsııaǵa tek ómirine ne densaýlyǵyna qaýip tóngen kezde ǵana júginedi. Al quqyq qorǵaý qyzmetkerleri oqıǵa ornyna barǵan sátte, ol agressoǵa qatysty aryz jazýdan bas tartady.

«Usynylyp otyrǵan túzetýler jábirlenýshilerdiń ótinishinsiz ákimshilik quqyq buzýshylyq týraly isterdi qozǵaýǵa múmkindik beredi. Hattama toltyrý úshin kýágerlerdiń, kórshilerdiń aıǵaqtary, beınebaqylaý kameralary men DVR jazbalary jetkilikti bolady. Osyǵan saı túpkilikti sheshimdi sot qabyldaıdy», - dedi Ákimshilik polıtsııa komıteti tóraǵasynyń orynbasary.

Buǵan qosa, endi jábirlenýshi men agressorǵa qaıta tatýlasý múmkindigi berilmeıdi. Renat Zulqaıyrovtyń aıtýynsha, byltyr turmystyq janjaldar boıynsha sotqa 47 myń ákimshilik is jiberilgen. Onyń ishinde 20 myńy taraptardyń tatýlasýyna baılanysty toqtatyldy. Al jańa ózgeriske saı, endi erli-zaıyptylarǵa mámilege kelý úshin sotta bir múmkindik beriledi.

Atalǵan ózgerister 1 shildeden bastap kúshine enedi.

Sonymen birge, Renat Zulqaıyrov jyl saıyn polıtsııaǵa otbasylyq janjaldar boıynsha 100 myńnan astam shaqyrtý túskenin aıtty.