Otbasylyq qundylyqtardy jáne genderlik teńdikti nasıhattaý jónindegi bılbordtardyń respýblıkalyq konkýrsy óz máresine jetti
ASTANA. Jeltoqsannyń 20-sy. QazAqparat /Marlan Jıembaı/ - Búgin QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysy ótti,
dep habarlaıdy QazAqparat.
Jıyn barysynda otbasylyq qundylyqtardy jáne genderlik teńdikti nasıhattaýǵa arnalǵan bılbordtar boıynsha alǵashqy respýblıkalyq baıqaýdyń óz máresine jetkenin atap ótken QR Eńbek jáne halyqtyń áleýmettik qorǵaý mınıstri Gúlshara Ádihalyqova, «baıqaýdyń negizgi maqsaty - otbasynyń bedelin jańǵyrtýǵa jáne qazaqstandyq qoǵamnyń damýyndaǵy onyń rólin nyǵaıtýǵa yqpal jasaý», dep atap ótti.
Baıqaý qorytyndysyn jarııalaǵan komıssııa múshesi Irına Ýnjakovanyń aıtýynsha, oǵan elimizdiń 9 oblysynan 56 jumys usynylǵan. Qatysýshylar arasynda kommertsııalyq emes sektorlardyń, bıznes qaýymdastyqtyń, shyǵarmashylyq ıntelegentsııanyń, sondaı-aq dızaınerlik jáne jarnama agenttikteriniń ókilderi bolǵan.
Qazylar alqasynyń sheshimimen «Ǵasyrdan ǵasyrǵa» atty týyndynyń avtory Ekaterına Gorkovenko bas júldeni ıelendi. Sonymen qatar baıqaýǵa qatysqan birqatar azamattar arnaıy dıplomdarmen marapattaldy.
Aıta keteıik, respýblıkalyq baıqaý otbasy músheleri arasyndaǵy qarym-qatynastar, urpaqtar sabaqtastyǵy, balaly otbasy, otbasy músheleriniń úı jumysyna qatysýy, ata-analardyń bala tárbıesine qatysýy atty 5 atalym boıynsha ótkizilgen bolatyn.
