«Otbasylyq kapıtal» pıramıdasy arzan páter alasyń dep eldi aldap, 450 mln teńgeni joq qylǵan

ASTANA. QazAqparat - «Semeınyı kapıtal» qarjy pıramıdasyn quryp, ony basqarǵan azamattyń zańsyz áreketin Qarjy monıtorıngi agenttiginiń astanalyq departamenti áshkereledi, dep habarlaıdy QazAqparat.

Ol turǵyn úı satyp alý boıynsha jalǵan baǵdarlama jasap, klıenttermen kelisimshart jasasqan.

Onyń sharty boıynsha 300 myń teńgeden 5 mln teńgege deıingi ınvestıtsııa, 30-dan 60 paıyzǵa deıin artyq tólemmen turǵyn úı alýdyń kútý merzimi 6 aıdan 10 aıǵa deıin kórsetilgen.

Sonyń saldarynan azamattar ýáde etken páterin almaǵan, salǵan qarjysy qaıtarylmaǵan.

Osylaısha, atalǵan azamat jalpy somasy 450 mıllıon teńgege jýyq materıaldyq shyǵyn keltirgen.

Ol qamaýǵa alynyp, ýaqytsha ustaý abaqtysyna qamaldy.

QR QPK 201-babyna sáıkes ózge aqparat jarııalanbaıdy.

QMA azamattardy qyraǵy bolýǵa jáne kúmándi qarjy ınstıtýttaryna aqsha salmaýǵa shaqyrady.

Eger siz jáne sizdiń týystaryńyz josyqsyz kásipkerlerdiń osyndaı áreketine tap bolsa, turǵylyqty jerińiz boıynsha ETD nemese myna telefondarǵa habarlasyńyz: 1458, 8 (7172) 70 84 79 (ishki 21384).