Otbasylyq-genderlik saıasatty jetildirý boıynsha jańa qadamdardy ázirleý kerek - Eraly Toǵjanov

NUR-SULTAN. QazAqparat – QR Premer-Mınıstriniń orynbasary Eraly Toǵjanov QR Aqparat jáne qoǵamdyq damý mınıstrligine birqatar mindetterdi júktedi, dep habarlaıdy QazAqparat tilshisi.

«Otbasylyq-genderlik saıasatty jetildirý boıynsha jańa qadamdardy ázirleý kerek. Qazirgi kezde tıisti zań jobasy qajetti talqylaýdan ótip jatqanyn bilemiz. Birinshi kezekte ol otbasylyq-turmystyq zorlyq-zombylyqqa qatysty bolyp tur. Jańa depýtattyq top quryldy. Keshe ǵana Parlamentte depýtattarmen birge osy taqyrypty talqyladyq. Bul másele qoǵamdy alańdatyp otyrǵanyn bilesizder. Sondyqtan sizdermen birlese osy baǵytta jumys isteıtin qadamdar bar», - dedi E. Toǵjanov atalǵan mınıstrliktiń keńeıtilgen alqa májilisinde.

Ol atalǵan zań jobasy tıisti rezonans týdyrǵanyn atap ótti.

«Bul óz kezeginde zańdy qubylys. Osy oraıda biz atalǵan reaktsııaǵa, syn-qaterge nazar aýdarýymyz kerek. Sondyqtan qoǵam kóterip otyrǵan máseleler mindetti túrde eskeriledi», - dedi Úkimet basshysynyń orynbasary.