Otbasylarda patronattyq tárbıede júrgen jetim balalarǵa 10 aılyq eseptik kórsetkish kóleminde járdemaqy tólenedi
ASTANA. Qazannyń 4-i. QazAqparat /Rýslan Ǵabbasov/ - Aldaǵy jyldan bastap otbasylarda patronattyq tárbıede júrgen jetim balalarǵa 10 aılyq eseptik kórsetkish kóleminde járdemaqy tólenedi. Bul týraly búgin Astanada ótken «Qazaqstan qoǵamynyń damýy men ornaýyndaǵy otbasy tárbıesiniń róli» atty dóńgelek ústelde Májilis depýtaty Aıtkúl Samaqova málim etti.
Úkimet basshysy orynbasarynyń qatysýymen ótken jıynda bul másele talqylanǵanyn jetkizgen depýtat, «bul 15 myń teńgeni quraıdy. Atap aıtqanda bastapqyda bul somadan joǵary kórsetkishti belgilegen bolatynbyz, alaıda 15 myń teńgege kelistik. Sebebi, birden 30 myń teńge kóleminde bekitip, bul deńgeıden attap ótýge múmkindik bermeıtin jaǵdaılar bar. Meniń oıymsha, eń bastysy bul másele turǵysynda memleket qoldaýy bar jáne osy turǵyda alǵashqy qadam jasalyp otyr»,- dedi.
Osy oraıda depýtat búginde 42 myń jetim balalar bar ekenin, onyń 15,5 myńy memlekettik balalar úıi men ınternattarda tárbıelenip jatqandyǵyn jetkizdi. 27,4 myń bala qamqorlyq jáne patronat jaǵdaıynda otbasy tárbıesine berilgen. A. Samaqovanyń aıtýynsha, otbasylarda patronattyq tárbıedegi balalarǵa járdemaqy tóleý máselesin QR Úkimeti qoldap otyr jáne tıisti qarjy 2011 jyldyń bıýdjetinde qarastyrylmaq.
