«Otbasy-turmystyq zorlyq-zombylyqtyń profılaktıkasy týraly» Zań kúshine endi, nátıje jaman emes - ІІM
ASTANA. Qazannyń 1-i. QazAqparat - Ótken jyldyń jeltoqsan aıynda otbasyndaǵy quqyq buzýshylyqqa qarsy áreket etý ádisterin odan ári jetildirý maqsatynda Іshki ister mınıstrligi ázirlegen «Otbasy-turmystyq zorlyq-zombylyqtyń profılaktıkasy týraly» Zań kúshine endi.
Osy Zańymen «Qorǵaý nusqamasy» uǵymy otbasy-turmystyq zorlyq-zombylyqtyń jeke profılaktıkasynyń biri retinde engizildi. Minez-qulqy jaqyndaryna qaýip tóndiretin adamdarǵa qorǵaý nusqamasy shyǵarylady. Qorǵaý nusqamasyn ishki ister organdarynyń basshylary shyǵarady, dep habarlaıdy QR ІІM Ákimshilik polıtsııasy komıtetinen.
Zańnyń qoldanysqa engenen keıin quqyq buzýshylyqqa jol bergen adamdarǵa qarsy 5 myńnan astam qorǵaý nusqamasy shyǵaryldy.
Qorǵaý nusqamasy 10 táýlik merzimge shyǵarylady. Jábirlenýshiniń ótinishi boıynsha qorǵaý nusqamasyn prokýror 1 aıǵa deıin uzartýy múmkin.
Qorǵaý nusqamasy jábirlenýshiniń erkine qaramastan, ony izdestirýge, izine túsýge, oǵan barýǵa, onymen aýyzsha, telefon arqyly sóılesýge jáne ózge de tásildermen baılanys jasaýǵa, sondaı-aq jıǵan ortaq múlikterin birlesip ıelenýge tyıym salynady. Qorǵaý sharalary quqyq buzýshy adamǵa jáne naqty mán-jaılarǵa baılanysty aıqyndalady. Qorǵaý nusqamasyn buzý bes aılyq eseptik kórsetkishke deıingi aıyppul túrindegi ákimshilik jaýapkershilikke tartýǵa ákep soǵady.
Sonymen qatar aǵymdaǵy jyly otbasy-turmystyq qarym-qatynastar salasynda quqyqqa qarsy is-áreketteri úshin ishki ister organdarynyń materıaldary boıynsha sot sheshimimen 21 myńnan astam quqyq buzýshy ákimshilik jaýapkershilikke tartyldy.
Qabyldanǵan is-sharalardyń nátıjesinde otbasy-turmystyq qarym-qatynastar salasyna qatysty qylmystardyń sany 10,5 paıyzǵa deıin tómendedi.
