Otbasy - tildiń ortasy, otbasy - tildiń uıasy men qazynasy - qazaq tilin jetik meńgergen ózge ult ókili
ASTANA. Qyrkúıektiń 21-i. QazAqparat /Gúlmıra Álıakparova/ - Otbasy - tildiń ortasy, otbasy - tildiń uıasy men qazynasy.
Bul pikirin búgin Astanada «Tili birdiń - tilegi bir» atpen ótken memlekettik tildi jetik meńgergen ózge ult jastarynyń respýblıkalyq forýmynda Taraz qalasyndaǵy №29-shy mekteptiń aǵylshyn tili pániniń muǵalimi Veronıka Kım bildirdi.
«Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynyń jobasynda memlekettik tildi meńgerýde otbasynyń alar ornyna basa nazar aýdarylǵan. Bul oryndy. Sebebi otbasy - tildiń ortasy, otbasy - tildiń uıasy men qazynasy», - deıdi ol.
V.Kımniń pikirinshe búgin bizde otbasyna memlekettik tildi úırenýge arnalǵan telebaǵdarlamalar jetispeıdi. Kez kelgen bala túsinip, qyzyǵyp oqıtyn baspa ónimderin kóptep shyǵarý kerek. Sebebi, qazaq tilindegi sapaly mýltfılmder joqtyń qasy. Otbasynda, kóshede, qoǵamdyq kólikterde men qyzmet kórsetý oryndarynda memlekettik tilde sóıleýdi qalyptastyrý jáne ony talap etý qajet. Sonymen birge onyń aıtýynsha, qaı dıaspora ókili bolmasyn qazaq tilin meńgerý qajettigin jiti túsinýi tıis.
«Qazaqstannyń bolashaǵy - qazaq tilinde. Olaı bolsa, qazaq tilin úırenýdi otbasynan bastaıyq. Úni dombyranyń únindeı qazaq tili, túri bólek bolsa da - tilegi bir, júzi basqa bolsa da - júregi bir barsha qazaqstandyqtardyń ortaq tili bolsyn», dep túıindedi ol sózin.
