Otbasy tek áleýmettik qamqorlyqqa emes, rýhanı-psıhologııalyq qamqorlyqqa da zárý - O. Asanǵazy
ASTANA. 18 qyrkúıek. QazAqparat - Otbasy tek áleýmettik qamqorlyqqa emes, rýhanı-psıhologııalyq qamqorlyqqa da zárý. Búgin Parlament Májilisiniń jalpy otyrysynda Úkimet basshysynyń atyna saýal joldaǵan depýtat Orazkúl Asanǵazy osylaı málim etti.
Depýtattyń sózine qaraǵanda, qoǵamda jastar tárbıesi áli de jetildirýdi, tolyqtyrýdy qajet etedi. Óıtkeni, onyń sózine qaraǵanda, statıstıkalyq málimetter elimizde ajyrasýdyń kóp ekendigin, urpaǵyna laıyqty tárbıe bere almaıyndardyń da sany jetkilikti ekenin baıqatqan. «Qazirgi órkenıetti kezeńde otbasy tárbıesimen arnaıy aınalysatyn kásibı psıhologtarǵa áleýmet asa zárý. Bizde jalpy psıholog mamandardy daıyndaý bolǵanymen, salalyq maman ıeleri daıyndalmaıdy. Shetelde bıznes, sport, saıasat, otbasy, taǵy da basqa salalardan arnaıy mamandar daıyndalady jáne olar qoǵamnyń rýhanı salaýattanýyna óz úlesterin qosady. Sondyqtan da, elimizdegi irgeli pedagogıkalyq joǵarǵy oqý oryndarynda otbasy tárbıesi kafedralaryn ashý - ózekti másele», - deıdi depýtat.
Onyń aıtýynsha, otbasy psıhologııasyna baılanysty arnaıy oqý quraldaryn daıyndaý, ádistemelik kabınetterdi jabdyqtaý, ǵylymı ádebıettermen tolyqtyrý, otbasylyq tárbıe berý isimen aınalysatyn qoǵamdyq uıymdardy qoldaý bul salany qalyptastyryp, damytpaq. Al qazirgi kezeńde oqytylyp júrgen psıhologııa páni jalpylama negizde, ultymyzdyń dástúrin, dilin, tilin, erekshelikterin eskere bermeıdi. Sol sebepten otbasy psıhologııasynda ár ultqa tán otbasylyq, áýlettik qasıetter eskerilip, ekshelene berse, onda qoǵamnyń rýhanı salaýattylyǵy artqan bolar edi dep esepteıdi ol.
«Biz otbasyn tek áleýmettik qamqorlyqqa emes, rýhanı-psıhologııalyq qamqorlyqqa da alǵanymyz abzal. Sonyń bir sharasy - azamattardyń hal-aktilerin tirkeý oryndarynda jańa úılenbek bolǵan jastarǵa psıhologııalyq keńes beretin, otbasy kıkiljińine alǵash keńes beretin ýchaskelik ınspektorlary, arnaıy otbasylyq psıhologııa mamany qajet», - deıdi depýtat Orazkúl Asanǵazy.
