Otbasy kúninde aqmolalyq Analar keńesiniń belsendileri marapattaldy
Halyqaralyq otbasy kúnine oraı uıymdastyrylǵan sharaǵa Aqmola oblysynyń ákimi Ermek Marjyqpev, Qazaqstan halqy Aqmola assambleıasy Analar keńesiniń tóraıymy Zere Qıyqova men músheleri, kópbalaly analar jáne etnomádenı birlestik músheleri qatysty.
Forýmda quttyqtaý sóz sóılegen aımaq basshysy Ermek Marjyqpev óńirde kópbalaly otbasylar men halyqtyń áleýmettik jaǵynan az qamtylǵan osal toptaryna memleket tarapynan kórsetilip jatqan kómek týraly aıtyp berdi.
«Otbasynyń ál aýqaty - elimizdiń damýynyń, órkendeýiniń ólshemi. Elbasy Nursultan Nazarbaev az qamtylǵan otbasylardyń tabysyn arttyrý, turǵyn úı máselesin sheshý, densaýlyq saqtaý jáne bilim berý salalaryn jaqsartý boıynsha áleýmettik bastamany kótergen bolatyn. Búgingi kúni bul másele Memleket basshysynyń jiti nazarynda», - deı kele oblys ákimi otbasylyq qundylyqtardy saqtaý jáne nasıhattaýda belsendilik tanytqan Qazaqstan halqy Aqmola assambleıasy Analar keńesiniń bir top múshelerin Alǵys hatpen marapattady.
Forým barysynda Zere Espaıqyzy otbasylyq qundylyqtar, ulttyq salt-dástúr, qazaq qyzyna tán bolmys, qoǵam qalyptasýyndaǵy analardyń róli týraly aıtty. Sondaı-aq, otbasyndaǵy tatýlyq pen qyz bala tárbıesi máselelerine toqtala ketti.
Budan keıin forýmǵa qatysýshy Birjan sal aýdany ákiminiń orynbasary Orynbasar Ahmetov, Stepnogor qalasy Analar keńesiniń tóraıymy Elena Abrıtsova sóz sóılep, óz óńirleri boıynsha atqarylyp jatqan jumystar týraly baıandady.
Forým sońynda Halyqaralyq otbasy kúnine oraı Qazaqstan halqy Aqmola assambleıasynyń Analar keńesi oblys turǵyndaryna úndeý joldady.
Aıta ketý kerek, Zere Espaıqyzy jetekshilik etetin Qazaqstan halqy Aqmola assambleıasynyń Analar keńesi 2014 jyly qurylǵan. Sondan beri otbasylyq qundylyqtardy nasıhattaý, otbasynda ananyń rólin arttyrýda jemisti eńbek etip keledi. Búgingi kúni Aqmola oblysynda 14 myń kópbalaly otbasy turady. Onyń ishinde 2,5 myńǵa jýyq ana - «Altyn alqa» ıegeri, 3,7 myńnan astam ana - «Kúmis alqa» ıegeri. 379 kópbalaly ana bar. 452 áıel «Ana dańqy» І jáne ІІ dárejeli ordenderimen marapattalǵan.
