Otbasy kúni qarsańynda Astana kolledjderinde «Máńgilik, mahabbat, tarıh» onlaın sabaǵy ótedi
ASTANA. 5 qyrkúıek. QazAqparat - Búgin Astanada Otbasy kúni qarsańynda qalanyń barlyq kolledjderinde «Máńgilik, mahabbat, tarıh» onlaın sabaǵy ótedi. Bul týraly astana.kz saıtyna qalalyq Balalardyń quqyqtaryn qorǵaý basqarmasynan habarlady. Sabaq QazMZÝ Gýmanıtarlyq-zań kolledjiniń bazasynda ótip, basqa kolledjderde translıatsııalanady.
Onlaın sabaq saǵat 11:00 bastalady jáne bir akademııalyq saǵattyń ishinde eki pedagog astanalyqtarǵa otbasylyq qundylyqtar týraly aıtyp beredi. Interaktıvti sabaqty Qazaqstan tarıhy pániniń muǵalimi jáne «SOS» balalar derevnıasynyń tárbıeshisi qazaq jáne orys tilderinde júrgizedi.
Uıymdastyrýshylar astana.kz saıtyna habarlaǵandaı, sabaq barysynda stýdentterge adamzattyń basty qundylyqtary, otbasyna jáne týǵan ólkesine degen mahabbat týraly aıtylady. Budan basqa, sabaq barysynda qazaq ulttyq aspaby - dombyra tanystyrylady. Balalar derevnıasynyń tárbıelenýshileri ulttyq aspapta oınaý sheberlikterin kórsetedi, al kolledj stýdentteri Týǵan jer men otbasy týraly óleńder oqıdy.
«Biz stýdentterdiń boıynda adamgershilik qundylyqtarǵa degen qyzyǵýshylyqty, bilimge qumarlyqty oıatyp, oı-óristerin keńeıtip, Otanyna degen maqtanysh pen mahabbat, halqynyń tarıhyn saqtaýshy otbasyǵa degen qurmet sezimderin tárbıelemekpiz. Bul sabaqtyń maqsaty qazirgi zamanǵy aqparattyq tehnologııalardy paıdalaný arqyly pedagogıkalyq tájirıbe almasý bolyp tabylady»,- deıdi uıymdastyrýshylar.
