Otbasy kúni: Elordalyq jas jubaılar «Báıterek» monýmentinde neke qıdy
NUR-SULTAN. QazAqparat – Otbasy kúni qarsańynda «Astana-Báıterek» monýmentinde jas jubaılar saltanatty túrde nekelesti, dep habarlaıdy QazAqparat tilshisi.
Saltanatty shara barysynda QR Aqparat jáne qoǵamdyq damý vıtse-mınıstri Asqar Ýmarov elordalyq 6 jupqa neke qııý týraly kýálikterin tabys etti.
«Ózderińiz biletindeı, 2013 jyldan bastap Elbasy Nursultan Nazarbaevtyń bastamasymen qyrkúıektiń ekinshi jeksenbisi – Otbasy kúni dep atalyp keledi. Osy kúni sizderdi úlken ómirge qadam basyp, shańyraq kóterýlerińizben Aqparat jáne qoǵamdyq damý mınıstri Aıda Balaevanyń atynan shyn júrekten quttyqtaımyn. «Otan otbasynan bastalady» degen sóz bar, bıyl bizdiń Táýelsizdigimizdiń 30 jyldyǵy ótedi. Bul jyldary ana men balany qoldaý boıynsha memlekettik deńgeıdegi otbasy saıasatynyń tutastaı júıesi qalyptasty», - dedi vıtse-mınıstr óziniń quttyqtaýynda.
Onyń aıtýynsha, búginde elimizdiń ár otbasynyń yrys-berekeli, baqytty ómir súrýi úshin aýqymdy jumystar júrgizilýde. Otbasylardy qoldaý baǵytynda áleýmettik tólem jelileri men turǵyn úı baǵdarlamalary qarastyrylǵan.
«Jaqynda ǵana Memleket basshysy Qasym-Jomart Toqaev Qazaqstan halqyna Joldaýynda Otbasylyq jáne genderlik saıasat kontseptsııasyna eleýli ózgerister engizý qajettigin atap ótti. Jyl saıyn Qazaqstanda 100 myńǵa jýyq jas jubaılar neke qııady. Búgingi osy saltanatty sharanyń «Báıterek» monýmentinde ótýi – sizderdeı jas otbasylardyń ósip kele jatqan aǵashtaı tarıhı tamyryn saqtap, myqty tiregi bar, bolashaqqa umtylysy bar memleketke aınalatynyn bildiredi», - deıdi Asqar Ýmarov.
Aıta keteıik, saltanatty neke qııý rásimin Esil aýdanynyń ákimdigi jyl saıyn ótkizedi. Mundaı sharalar «EKSPO-2017», «Atameken» etno-memorıaldy keshenderinde Qazaqstannyń basty týtuǵyrynda ótken edi. Kezekti rásim búgin «Báıterekte» ótkizildi.
«Esil aýdanynyń ákimdigi pandemııa jaǵdaıyn eskere otyryp, taza aýada jas jubaılardy quttyqtaý tájirıbesin alǵashqylardyń biri bolyp engizgen edi. Sondyqtan bul dástúr jalǵasa beredi. Sizderdi Esil aýdany atynan shyn júrekten quttyqtaımyn jáne zor densaýlyq tileımin», - dedi Nur-Sultan qalasy Esil aýdanynyń ákimi Berik Jákenov.
Baqytty jas jubaılardyń biri – Medet pen Ánel osy saltanatty rásimge qatysý úshin Kanadadan arnaıy kelgen.
«Bizdiń neke týraly kýáligimizdi saltanatty túrde tabystaǵanyna óte qýanyshtymyz. Biz úılený toıyn shaǵyn formatta ótkizdik, aýqymdy toı josparymyzda da bolmaǵan. Ózimiz Kanadadaǵy oqýdan demalysqa kelip, úılený toıyn ótkizýdi uıǵardyq. Biz bes jyl boıy kezdesdik, kóp nárseni bastan ótkerdik. Barlyq otbasylarǵa túsinistik, shydamdylyq jáne bir-birin súıip, baǵalaýyn tileımin», - deıdi Ánel Turǵanbaeva.
Sonymen birge, jas jubaılar arasynda «100 jańa esim» jobasynyń jeńimpazy, prodıýser, rejısser, New York Film Academy túlegi Aıdıe Aıdarbekov te bar.
Aıta keteıik, bıylǵy Otbasy kúni merekesi 12 qyrkúıekte toılanady.
