Otbasy kúni: Elordada mektepte januıalyq fleshmob jáne sporttyq jarystar ótkizildi
NUR-SULTAN. QazAqparat – Elordada Otbasy kúni merekesine oraı qalalyq №64 mektep-lıtseıinde ata-analardyń qatysýymen sporttyq shara ótti, dep habarlaıdy QazAqparat tilshisi.
Otbasy qundylyqtaryn nasıhattaý maqsatynda uıymdastyrylǵan shara aıasynda «Biz birgemiz» atty otbasylyq fleshmob jáne komandalar arasynda sporttyq estafetalyq jarystar ótkizildi. Sonymen birge oqýshylar óz ónerlerin ortaǵa salyp, shyǵarmashylyq talanttaryn kórsetti. Jarys jeńimpazdary arnaıy dıplomdarmen marapattaldy.
«Ózderińizge belgili, Elbasy N.Ə. Nazarbaev «Otbasy kúnin» belgilep, otbasy qundylyǵyna erekshe kóńil bólip otyr. Árıne, bul merekeli kúnniń mańyzy óte joǵary. «Otan otbasynan bastalady» deıdi halqymyz. Ár shańyraqtyń bereke-birligi balaǵa erekshe áser etedi. Jyly januıadan qoǵamǵa bereri mol meıirimdi azamattar ósip shyǵady. Biz bala tárbıesinde árdaıym ata-analarmen birlesip jumys isteýdi basty nazarda ustaımyz. Búgingi is-sharamyz da sonyń bir kórinisi. Balalardyń komandamen jumys isteýge beıimdelýi, óz otbasyn qadirleýi osydan bastalady. Salaýatty ómir saltyn ustanyp, urpaqqa úlgi bolatyn ata-analarymyz kóp bolsyn!» - deıdi mektep dırektory Baný Baımýratova.
Aıta keteıik, 2013 jyly Qazaqstan Respýblıkasynyń tuńǵysh Prezıdenti Nursultan Nazarbaevtyń «Qazaqstan Respýblıkasyndaǵy kásiptik jáne ózge de merekeler týraly» Zańyna ózgertýler engizý jónindegi Jarlyǵyna sáıkes, qyrkúıek aıynyń ekinshi jeksenbisi - Otbasy kúni bolyp bekitilgen bolatyn.
