Otbasy qundylyqtaryn qoǵamda keńinen nasıhattaý mańyzdy - «Mereıli otbasy» baıqaýynyń elordalyq jeńimpazy
ASTANA. QazAqparat - «Mereıli otbasy» ulttyq baıqaýynyń Astana qalasy boıynsha jeńimpazy Kendaı Ahmetovtyń otbasy nemerelerin de temirjol salasyna baýlýdy josparlap otyr.
«Biz temirjolshy áýletinenbiz. Jalpy Ahmet atamnan taraǵan urpaqtyń osy saladaǵy eńbek ótili 1264 jyldy qamtyp otyr. Ákem Tóleýhan men onyń aǵalary da temirjolda eńbek etti. Atap aıtqanda, bul salada ózimniń jáne joldasymnyń, sondaı-aq balalarymnyń eńbek ótilin qosqanda 107 jyl jumys istep kelemiz. Bul - bizdiń otbasymyzdyń eńbek joly», - dedi Kendaı Ahmetov «QazAqparat» agenttigine bergen suhbatynda.
Osy mereıli otbasy úsh qyz jáne bir ul tárbıelep, olardan nemereler súıip otyr.
«Áýletimizdegi dástúrdi jalǵastyryp, nemerelerim de temirjolshy mamandyǵyn jalǵastyrǵanyn qalaımyn. Olardy bul salaǵa baýlyp kórýge tyrysamyz», - dep toqtaldy K. Ahmetov.
Endi astanalyq jeńimpaz qyrkúıekte ótetin respýblıkalyq saıysta baq synaıdy. Bıyl K. Ahmetovtyń otbasy elordada ótinim bergender arasynda úzdik dep tanyldy.
«Baıqaýda bıyl jeńiske jetkenimizge qýanyshtymyn. Bul jaqsy bastama. Óıtkeni, bul baǵytta ulttyq qundylyqtar men dástúrimizge, urpaq tárbıesine tereń mán beriledi. Biz bala tárbıesine aıryqsha nazar aýdarýǵa tyrystyq. Sondyqtan otbasy qundylyqtaryn qoǵamda keńinen nasıhattaý mańyzdy dep bilemin», - deıdi Kendaı Ahmetov.
Esterińizge sala keteıik, "Mereıli otbasy" konkýrsy aıasynda Qazaqstannyń eń úzdik otbasy Astanada 12 qyrkúıek kúni anyqtalady.Saıystyń oblystyq kezeńi 23 mamyrda ótken bolatyn. Onda jeńiske jetken otbasylar Astanada ótetin konkýrstyń aqtyq saıysy men "Mereıli otbasy" gala-kontsertine qatysýǵa múmkindik aldy. Bul shara Otbasy kúni qarsańynda ótkizilip, 12 qyrkúıek kúni elimizdegi eń úzdik otbasy belgili bolady. «Mereıli otbasy» konkýrsy bıyl Qazaqstannyń barlyq óńirlerinde 1 sáýirde bastalǵan bolatyn. Oǵan 500-den astam otbasy qatysty.
Aıta keteıik, aqtyq synǵa ótken 16 úmitker otbasynyń ishinde úzdigin tańdaý SMS-habarlamalar jáne ınternet arqyly daýys berý nátıjesinde júrgiziledi. Daýys berýdiń bastalýy týraly aqparat ulttyq telearnalar arqyly jarııalanady. Fınaldyń telenusqasy 14 qyrkúıekte kórsetiledi.
