Otbasy qundylyqtaryn dáripteıtin «Qara shańyraq» telehıkaıasy kórsetiledi
ASTANA. QazAqparat - «Qazaqstan» telearnasynda 25 tamyzdan bastap, «Qara shańyraq» serıaly kórsetiledi», - dep habarlady «Qazaqstan» Respýblıkalyq teleradıokorporatsııasynyń baspasóz hatshysy Raýan Esqalı.
Telehıkaıa áleýmettik-ıdeologııalyq baǵytta túsirilgen. Týǵan el men qara shańyraqty súıip, ata dástúrdi qurmetteý, otbasy qundylyqtaryn dáripteý - serıaldyń basty maqsaty. Sonymen qatar, bul týyndyda qarapaıym turmystyq máseleler, týǵan-týys arasyndaǵy qarym-qatynas sýrettelgen.
«Munda mahabbat ta, zulymdyq ta, opasyzdyq ta, túńilý de, úreı men qaısarlyq, senim men úmit, adaldyq pen tazalyq ta bar. Serıal qarapaıym otbasynda ósken úsh aǵaıyndy týraly. Onda otbasynda jaqsy tárıbe alǵanymen túrli ortaǵa tap bolǵan jigitterdiń ómiri baıandalady», delingen habarlamada. Rólderde aǵaıyndylardyń rólin: Azamat Satybaldy, Ádil Ahmetov, Dáýren Serǵazın syndy birneshe telejobalarda kózge túsken akterlar somdaıdy Sonymen qatar, rólderde Baqytjan Álpeıisov, Igor Lıchadeev, Oksana Boıchenko, rok-ánshi Ásem Kópbaeva jáne Saıat Merekeuly men Bolat Ábdilmanov sııaqty tanymal tulǵalar oınaıtyn bolady.
