Otbasy eldiń qoǵamdyq-saıası negizi bolyp sanalady - G. Ábdihalyqova
ASTANA. Qarashanyń 25-i. QazAqparat /Jasulan Amanbaıuly/ - Qoǵamda otbasy ınstıtýtyn qalyptastyrý jáne otbasyndaǵy genderlik teńdikti ornatý boıynsha maqsatty jumystar jasalýda.
Búgin Astanada bolǵan «Qazaqstannyń EQYU-ǵa tóraǵalyq etýi: genderlik aspekt» atty halyqaralyq konferentsııada QR Eńbek jáne halyqty áleýmettik qorǵaý mınıstri Gúlshara Ábdihalyqova Qazaqstandaǵy otbasy jáne otbasyndaǵy genderlik teńdik saıasaty jóninde habardar etti.
«Otbasy - memlekettiń áleýmettik uıashyǵy ǵana emes, eldiń qoǵamdyq-saıası negizi bolyp sanalady. Ana men balanyń áleýmettik jaǵdaıyn arttyrý basymdyqty sala bolǵandyqtan, Elbasy Nursultan Nazarbaev jańa áleýmettik baǵdarlamany jasaqtaýǵa tapsyrma bergen bolatyn. Sonyń arqasynda 2006 jyldan beri ana men balaǵa arnalǵan áleýmettik tólemder júıesi oryndalyp keledi. Bul jaǵdaı eldegi bala týýdyń ósimine ákeldi», deıdi mınıstr.
Onyń aıtýynsha, «2008 jyly Qazaqstanda 360 myń bala dúnıege kelgen. Bul 2007 jylmen salystyrǵanda 42 myń balaǵa kóp. Qazaqstannyń tarıhynda eń kóp bala týý kórsetkishi -1985-1986 jyldar. Qazir biz osy kórsetkishke jetýge jaqyndap ta qaldyq».
