«Otbasy bank» salymshylary «7-20-25» baǵdarlamasynyń ornyna usynylǵan ıpotekaǵa qalaı qatysady
Buǵan deıin «Otbasy bank» aktsıonerlik qoǵamynan shot ashyp, páter alatyn aqshasyn sondaǵy depozıtke nemese arnaıy shotqa jınap júrgen adamdar «7-20-25» baǵdarlamasynyń ornyna usynylǵan jańa baǵdarlamaǵa qatysa ala ma ?
Bul suraqqa QR Indýstrııa jáne ınfraqurylymdyq damý vıtse-mınıstri Erkebulan Daýylbaev jaýap berdi.
«Buıryq jobasyna sáıkes, «Otbasy bank» salymshylary ıpotekalyq turǵyn úı qaryzdary boıynsha syıaqy mólsherlemesiniń bir bóligin óteý úshin kvazımemlekettik sektor sýbektileri arqyly sýbsıdııalana almaıdy.
«Otbasy bank» salymshylary syıaqy mólsherlemesiniń bir bóligin óteý maqsatynda kvazımemlekettik sektor sýbektileri arqyly sýbsıdııalanýy úshin jınaǵan qarajattaryn sheship alýy tıis», - dep jazylǵan vıtse-mınıstrdiń QazAqparat saýalyna joldaǵan jaýabynda.
Eske sala keteıik, mınıstrlik jańa ıpotekalyq baǵdarlamanyń sharttaryn «Ashyq NQA» portalynda jarııalap, kópshilik talqysyna usynǵan bolatyn.
Vıtse-mınıstrdiń málimeti boıynsha, buıryq jobasy búginde Ulttyq ekonomıka jáne Qarjy mınıtrlikteriniń kelisimin almaǵan.
«Aldaǵy ýaqytta joǵaryda atap ótken mınıstrlikter kelisimin bergen jaǵdaıda, buıryq jobasy Ádilet mınıstrliginen tirkeýden ótip, Qazaqstan Respýblıkasy Qarjy mınıstrliginiń qarjylandyrýynan soń ótinishter azamattardan qabyldanatyn bolady», - deıdi mınıstrdiń orynbasary.
