Otbasy bank pen Semeı qalasynyń ákimdigi «Abaı jastary» baǵdarlamasyn iske qosty
Ol 35 jasqa deıingi Semeı qalasynyń turǵyndaryna barynsha tıimdi sharttarmen baspana satyp alýǵa kómektesedi.
«Abaı jastary» baǵdarlamasyna jergilikti ákimdikte úı kezeginde turǵan azamattar qatysa alady. Sondaı-aq ótinishter dárigerler, mádenıet jáne sport qyzmetkerleri men jýrnalısterden qabyldanady.
Qatysýshylar úshin nesıeniń paıyzdyq mólsherlemesi jyldyq 5% teń bolady. Zaemnyń eń joǵary somasy – 15 mln teńgege deıin. Alǵashqy jarna baspana qunynyń kem degende 10% teń bolýy kerek. Nesıe 19 jylǵa deıin beriledi.
Qoljetimdi nesıelendirý baǵdarlamasyn júzege asyrýǵa Semeı qalasynyń ákimdigi 573 mln teńge qarajat bólinip otyr. Onyń kómegimen Otbasy bank «Abaı jastary» qatysýshylaryn nesıelendiretin bolady.
Baǵdarlamaǵa qatysýdy kózdegen turǵyndar Abaı aýdany, Semeı qalasynyń Turǵyn úı ınspektsııasy bólimine ótinish bere alady. Meken-jaıy: Shmıdt kóshesi 9/1, 1-qabat. Ótinishter 2022 jyldyń 22 jeltoqsanynan bastap 2023 jyldyń 12 qańtaryna deıin qabyldanady.
Ótinish berý úshin ózińizben birge jyljymaıtyn múliktiń joqtyǵy týraly anyqtama (baǵdarlamaǵa qatysýshy jáne otbasy músheleri úshin), sońǵy 1 jyldaǵy zeınetaqy jınaqtary týraly anyqtama (ony egov.kz saıtynan alýǵa bolady), neke nemese ajyrasý týraly kýálikti, balalardyń týý týraly kýáligin, jumys ornynan anyqtama (qyzmettik blankide nemese uıymnyń mórimen rastalǵan, laýazymy, jumys merzimi, jalaqysy kórsetilgen) jáne eńbek ótilin rastaıtyn qujattardy alyp kelý qajet.
«Abaı jastary» baǵdarlamasynyń qatysýshylaryna qoıylatyn talaptar:
1. Ótinim bergen kezde qatysýshynyń jasy 35 jastan (qosa alǵanda) aspaýy kerek.
2. Baǵdarlamaǵa qatysýshynyń jáne onyń otbasy músheleriniń sońǵy 5 jyl ishinde Qazaqstan Respýblıkasynyń aýmaǵynda menshik quqyǵyndaǵy turǵyn úıiniń bolmaýy.
3. Zeınetaqy salyǵyn mindetti túrde tóleı otyryp, tańdalǵan salada keminde sońǵy 6 aı resmı jumys ótili jáne (nemese) jeke kásipker mártebesinde keminde alty aı tirkeýi bolýy qajet.
4. Baǵdarlamaǵa erli-zaıyptylardyń bireýi ǵana qatysa alady.
Jeńildikpen nesıe alatyn úmitkerler pýlyna baǵdarlama talaptaryna saı keletin ári upaı sanyn kóp jınaǵan qatysýshylar kiretin bolady. Upaılarǵa nekede turǵan jyldar sany, balalarynyń bar-joqtyǵy, jumys ótili sııaqty jaıttar esepteletin bolady.
Sondaı-aq Semeıde órt sóndirýshilerge arnalǵan aımaqtyq turǵyn úı baǵdarlamasy qolǵa alynýda. Birinshi kezeńde jergilikti ákimdik ony nesıelendirýge 90 mln teńge bólýde. Nesıeni Otbasy bank beretin bolady.
Nesıe boıynsha syıaqy mólsherlemesi 5% bolady. Eger baǵdarlamanyń bolashaq qatysýshysy turǵyn úıdi alǵashqy naryqtan satyp alýdy josparlasa, onda ol úshin bastapqy jarna 0%-ǵa teń bolady. Al eger úı nemese páter qaıtalama naryqtan satyp alynsa, onda bastapqy jarna 10% quraıdy. Nesıeniń maksımaldy somasy – 10 mln teńge.
