Otbasy aıyna 3 myń tólep, avtobýspen tegin júre alady - Áset Isekeshev
ASTANA. QazAqparat - Búgin elordanyń kólik keshenin damytýǵa arnalǵan partııalyq tyńdaýda "Astana LRT" kompanııasy qoǵamdyq kólik "salyǵyn" engizýdi usyndy. Qala ákimi Áset Isekeshev atalǵan bastamany ne úshin kóterip jatqanyn túsindirdi, dep xabarlaıdy QazAqparat tilshisi.
"Bizde qoǵamdyq kólikpen jol júrý aqysy 90 teńge turady. Alaıda janar-jaǵarmaı qymbattady, devalvatsııa boldy. Tarıf ózgermedi. 90 teńge qala berse, bıýdjetten qoǵamdyq kólik salasyn sýbsıdııalaý kólemi jyl saıyn artyp otyrady. Bıýdjetke úlken salmaq túsedi. Bılet baǵasyn 150 teńgege kótersek, sýbsıdııany azaıta alamyz. Al jol júrý aqysy 300 teńge bolsa, sýbsıdııadan múldem bas tartýǵa bolady. Bıýdjetke jaqsy. Degenmen, 300 teńge tym kóp, xalyq úshin tym aýyr bolady", - deıdi Isekeshev.
Qala basshysynyń aıtýynsha, búginde ákimdik qoǵamdyq kólik salasyn qarjylandyrýdyń úsh jolyn usynyp otyr. Birinshisi - tarıf + sýbsıdııa. Ekinshisi - tarıfti, ıaǵnı bılet baǵasyn kóterý. Úshinshisi - avtobýspen tegin qatynaý. Alaıda ol úshin aı saıyn belgili bir sommada alymdy tóleý kerek.
"Endi, ol salyq emes, qoǵamdyq kólikti damytý úshin alynatyn kommýnaldyq tólem tárizdi. Mysaly, qazir bir otbasy 30-40 myń teńgege jol júrý abonementin ("proezdnoı" - avt.) satyp alsa, jańa júıe boıynsha úsh-aq myń teńge tóleıtin bolady. Jeke kólikpen júretin biz de úsh myńnan tóleımiz. Sonda bárimiz qoǵamdyq kólik salasyn damytýǵa aqsha quıǵandaı bolamyz. Árıne, bul máseleni áli de talqylaý qajet. Halyqtyń pikirin bilgen jón", - dep atap kórsetti Áset Órentaıuly.
