Otbasynyń tsıfrlyq kartasyndaǵy sanat qate bolsa, qaıda júginý kerek
ASTANA. KAZINFORM — Otbasynyń tsıfrlyq kartasynda otbasy quramy nemese ál-aýqat deńgeıi qate kórsetilse, azamattar turǵylyqty jeri boıynsha tıisti memlekettik organdarǵa júgine alady. Mamandar málimetterdi tekserip, qateni túzetýge kómektesedi.
Ol úshin Eńbek jáne halyqty áleýmettik qorǵaý mınıstrligi Áleýmettik qorǵaý salasyndaǵy retteý jáne baqylaý komıtetiniń aýmaqtyq departamentine nemese ákimdiktiń jumyspen qamtýdy úılestirý jáne áleýmettik baǵdarlamalar basqarmasyna habarlasý qajet.
Mamandar derekterdi tekserip, sáıkessizdiktiń sebebin anyqtaıdy. Qate málimet bastapqy derekkózde túzetilgen soń jańartylǵan aqparat Otbasynyń tsıfrlyq kartasyna avtomatty túrde túsedi. Otbasynyń sanaty kelesi baǵalaý kezinde qaıta esepteledi.
Derekter túzetilgennen keıin qaıta ótinish berýdiń qajeti joq.
Otbasylardyń ál-aýqat deńgeıi aı saıyn baǵalanady. Sondyqtan belgilengen sanat turaqty bolyp qalmaıdy. Memlekettik aqparattyq júıelerdegi málimetter ózgergen saıyn kartadaǵy aqparat ta jańartylady.
Máselen, otbasynyń tabysy azaısa, múlki satylsa, músheleriniń sany kóbeıse nemese turmys jaǵdaıynda basqa da ózgerister bolsa, onyń ál-aýqat deńgeıi qaıta baǵalanady.
Otbasynyń tsıfrlyq kartasy 2023 jylǵy 1 qańtardan beri jumys isteıdi. Qazir júıede 6,2 mıllıon otbasyn quraıtyn 20,6 mıllıon azamat týraly málimet bar.
Júıe ár otbasynyń áleýmettik-ekonomıkalyq jaǵdaıy týraly aqparatty jınaqtap, ál-aýqat deńgeıin anyqtaıdy. Bul memleketke azamattardyń qandaı kómekke muqtaj ekenin aldyn ala aıqyndap, tıisti qoldaý sharalaryn ótinish kútpeı usynýǵa múmkindik beredi.
Baǵalaý ádistemesi halyqaralyq tájirıbe negizinde Birikken Ulttar Uıymynyń Damý baǵdarlamasymen birlesip ázirlengen.
Otbasylar ál-aýqat deńgeıine qaraı bes sanatqa bólinedi:
· A — ál-aýqaty joǵary;
· V — aýqatty;
· S — ál-aýqaty qanaǵattanarlyq;
· D — ekonomıkalyq turǵydan osal;
· E — ekonomıkalyq jáne áleýmettik turǵydan osal.
Otbasynyń qaı sanatqa jatatyny bir ǵana kórsetkishke qarap anyqtalmaıdy. Baǵalaý segiz negizgi baǵyt boıynsha 59 kórsetkishti qamtıdy. Atap aıtqanda:
· otbasynyń qarjylyq jaǵdaıy;
· múlki men basqa da aktıvteri;
· turǵyn úı jaǵdaıy;
· jeńil jáne kommertsııalyq kóliginiń bolýy;
· jer telimi men jeke qosalqy sharýashylyǵy;
· otbasy músheleriniń jumyspen qamtylýy;
· nesıeleri men merzimi ótken beresheginiń bolýy;
· kásipkerlikpen aınalysýy jáne basqa da kórsetkishter.
Otbasynyń sanaty tek tabysyna, baspanasyna nemese kóligine qarap belgilenbeıdi. Onyń áleýmettik-ekonomıkalyq jaǵdaıyna qatysty barlyq málimet eskeriledi.
Mysaly, «A» sanatyna jatatyn otbasylardyń jan basyna shaqqandaǵy tabysy eń tómengi kúnkóris deńgeıinen keminde jeti ese joǵary, ıaǵnı shamamen 350 myń teńge nemese odan kóp bolady. Mundaı otbasylardyń ár múshesine shaqqanda shartty túrde keminde 120 sharshy metrden keletin birneshe baspanasy, kommertsııalyq jyljymaıtyn múlki, jeke bıznesi, sondaı-aq lıýks nemese premıým sanatyndaǵy qymbat avtokólikteri bolýy múmkin.
Otbasylardyń ál-aýqatyn osylaı baǵalaý memlekettik qoldaý kórsetý kezinde olardyń naqty jaǵdaıyn dálirek anyqtap, áleýmettik kómekti muqtaj azamattarǵa baǵyttaýǵa múmkindik beredi dep kútiledi.
Buǵan deıin 2027 jyldan bastap birqatar áleýmettik tólemdi taǵaıyndaý tártibi ózgeretini habarlanǵan bolatyn.
