Otbasynyń tsıfrlyq kartasy arqyly 1,2 myńnan astam adamǵa memlekettik qyzmet kórsetildi
ASTANA.KAZINFORM - Otbasynyń tsıfrlyq kartasyn engizýdiń nátıjesinde 2026 jyldyń basynan beri áleýmettik-eńbek salasyndaǵy memlekettik qyzmetterdi proaktıvti kórsetý úshin 3 828 adamǵa SMS-habarlama joldandy. Bul rette ótinish berýsiz járdemaqy nemese tólem alý múmkindigin 1218 myńnan astam adam paıdalandy.
Otbasynyń tsıfrlyq kartasy memlekettik organdardyń qoldanystaǵy barlyq aqparattyq júıeleriniń derekteri negizinde qalyptastyrylady. Eńbek jáne halyqty áleýmettik qorǵaý mınıstrligi málimetinshe, búginde onda Qazaqstannyń 20 mln azamaty nemese 6,2 mln-nan astam otbasy týraly aqparat jınaqtalǵan.
OTsK engizýdiń basty maqsaty – qazaqstandyqtardyń memlekettik qoldaý júıesine teń qoljetimdiligin qamtamasyz etý. Osyǵan baılanysty QR Áleýmettik kodeksinde Otbasynyń tsıfrlyq kartasy áleýmettik saıasattyń orta jáne uzaq merzimdi mindetteri men baǵyttaryn aıqyndaý quraly retinde belgilengen. Sondaı-aq, OTsK azamattardyń áleýmettik mártebesine baılanysty kepildendirilgen memlekettik qoldaýdyń qandaı da bir túrin alýǵa quqyly ekendigi týraly kúndelikti «elektrondyq habarlama» bolyp sanalady.
Qazirgi ýaqytta OTsK memlekettik qoldaý sharalaryn alýǵa quqyǵy bar qazaqstandyqtarǵa qandaı da bir ótinishtersiz járdemaqylar men áleýmettik tólemderdiń 11 túrin resimdeýge múmkindik beredi: eńbek etý qabiletinen aıyrylǵan jaǵdaıda áleýmettik tólem; jumysynan aıyrylǵan jaǵdaıda áleýmettik tólem; asyraýshysynan aıyrylý boıynsha áleýmettik tólem nemese járdemaqy; múgedektigi bar balany tárbıelep otyrǵan ata-anasyna (qamqorshysyna) járdemaqy; múgedektigi boıynsha járdemaqy; kópbalaly otbasylarǵa beriletin járdemaqy; «Altyn alqa» jáne «Kúmis alqa» alqalarymen marapattalǵan kópbalaly analarǵa beriletin járdemaqy; ataýly áleýmettik kómek; sondaı-aq jerleýge arnalǵan birjolǵy tólem.
Sondaı-aq OTsK arqyly zeınetaqy tólemderin alý múmkindigi, «qandas» mártebesi berilgende nemese uzartylǵanda mártebeniń aıaqtalý merzimi jáne jumyssyz adamdar úshin jumyspen qamtý sharalary týraly avtomatty habarlamalar iske asyryldy.
Memlekettik qoldaý sharalaryn alýǵa quqyq belgilengen kezde áleýetti alýshyǵa 1414 biryńǵaı baılanys ortalyǵynan SMS-habarlama jiberiledi. Habarlama alǵan azamat oǵan kelisimi týraly jaýap berýi kerek. Ótinishti resimdeý jáne áleýmettik járdemaqy nemese tólem taǵaıyndaý avtomatty rejımde júrgiziledi, sodan keıin qarajat alýshynyń bank shotyna aýdarylady.
- Alaıaqtyq táýekelin boldyrmaý maqsatynda 1414 biryńǵaı baılanys ortalyǵynan kelip túsken SMS-ke jaýap berý qajettigin atap ótemiz. Barlyq suraqtar boıynsha 1414 nómirine habarlasýǵa bolady. Qońyraý shalý tegin, - delingen mınıstrlik habarlamasynda.
Aıta keteıik, SQO-da eńbek táýekelderiniń tsıfrlyq kartasyna 30 shaqty kásiporyn engen.
