Otbasynyń tsıfrlyq kartasy 20,4 mln qazaqstandyqty qamtıdy
ASTANA. KAZINFORM – Qazaqstanda Otbasynyń tsıfrlyq kartasy 6,2 mln otbasynyń nemese 20,4 mln adamnyń áleýmettik-ekonomıkalyq jaǵdaıyn baǵalaýǵa múmkindik beredi, dep málimdedi Eńbek jáne halyqty áleýmettik qorǵaý mınıstrligi.
2023 jyldan beri jumys isteıtin júıe 30 tsıfrlyq derekkózdegi málimetterdi paıdalanady. Onyń kómegimen otbasylardyń áleýmettik jaǵdaıy anyqtalyp, memlekettik qoldaýǵa muqtaj azamattar aıqyndalady.
Baǵalaý kezinde otbasynyń tabysy, turǵyn úıi, avtokóligi, jer ýchaskesi, kásipkerlik qyzmeti jáne kredıttik júktemesi eskeriledi.
– Sonymen qatar otbasy músheleriniń sany, jasy, balalardyń, múgedektigi bar adamdardyń bolýy jáne basqa da ómirlik jaǵdaılar nazarǵa alynady. Jınaqtalǵan málimetter negizinde otbasylar ál-aýqatynyń bes sanaty boıynsha bólinedi: joǵary, aýqatty, qanaǵattanarlyq, ekonomıkalyq osal jáne ekonomıkalyq ári áleýmettik osal. Júıeniń basty maqsaty – ár otbasynyń naqty jaǵdaıyn baǵalap, qajetti áleýmettik kómekti der kezinde usyný, – delingen aqparatta.
Otbasynyń tsıfrlyq kartasy azamattardyń materıaldyq jaǵdaıyn ǵana emes, áleýmettik qoldaýǵa qajettiligin de anyqtaýǵa baǵyttalǵan.
Aıta keteıik, buǵan deıin Otbasynyń tsıfrlyq kartasyndaǵy ál-aýqat sanaty qate kórsetilgen jaǵdaıda qaıda júginý kerektigi túsindirilgen bolatyn.
