Otbasynyń tabysy, baspanasy men nesıesi sanatyna qalaı áser etedi
ASTANA. KAZINFORM — Otbasynyń ál-aýqaty qalaı anyqtalady: C, D jáne E sanattaryna qandaı otbasylar jatady?
Qazaqstanda otbasynyń áleýmettik jaǵdaıyn baǵalaǵanda tek tabysy ǵana emes, basqa da kórsetkishter eskeriledi. Máselen, otbasy músheleriniń jumysy, baspanasynyń bolýy, múlki, nesıeleri men jınaqtary nazarǵa alynady.
C sanatyna tabysy ortasha, turmys jaǵdaıy qanaǵattanarlyq otbasylar jatady.
D sanatyndaǵy otbasylardyń qarjylyq jaǵdaıy qıyndaý bolady. Olardyń tabysy tómen, turaqty jumysy men jeke baspanasy bolmaýy múmkin. Sondaı-aq merzimi ótken nesıeleri jáne otbasynyń materıaldyq jaǵdaıyna áser etetin basqa da qıyndyqtary bolýy múmkin.
E sanatyna memleket tarapynan birinshi kezekte qoldaý qajet otbasylar jatady. Ádette, mundaı otbasylarda birden birneshe qıyndyq kezdesedi. Mysaly, tabysy kedeılik sheginen edáýir tómen bolýy, turaqty jumysy, baspanasy, múlki men jınaǵy bolmaýy, sondaı-aq merzimi ótken nesıeleri bolýy múmkin.
Otbasynyń sanaty bir ǵana kórsetkishke qarap anyqtalmaıtynyn eskerý mańyzdy. Otbasynyń tsıfrlyq kartasy 50-den astam ólshemshartty eskeredi. Olardyń qatarynda tabys deńgeıi, jumyspen qamtylýy, turǵyn úı jaǵdaıy, múlki, kóligi, nesıeleri, kásibiniń, jer ýchaskesiniń jáne jeke qosalqy sharýashylyǵynyń bolýy, sondaı-aq áleýmettik jaǵdaıy bar.
Otbasynyń ómirlik jaǵdaıy ózgerse, onyń sanaty da qaıta qaralýy múmkin.
Aıta ketelik A sanatyna ál-aýqaty joǵary otbasylar, al B sanatyna aýqatty otbasylar jatatyny týraly jazǵan edik.
