Otbasynyń ál-aýqat sanattarynyń engizilýi: bankter nesıe berýden bas tartýy múmkin be
ASTANA. KAZINFORM — Otbasynyń ál-aýqaty sanattarynyń engizilýi nesıe berýge qanshalyqty áser etýi múmkin. Bul suraqqa Ulttyq bank tóraǵasy Tımýr Súleımenov jaýap berdi.
Onyń aıtýynsha, Qazaqstannyń qarjy sektory tsıfrlyq tehnologııalar men derekqorlardy ıntegratsııalaýdy burynnan qoldanyp keledi.
- Bul jaǵdaı ulttyq qarjy ınfraqurylymynyń operatorlary retinde bizge de jáne kommertsııalyq bankterge de qatysty. Memlekettik kredıttik bıýro men Birinshi kredıttik bıýro ártúrli derekqorlarmen, sonyń ishinde aktıvter, jeke tabys jáne basqa da málimetterdi qamtıtyn derekqorlarmen ıntegratsııa ornatýǵa múmkindik beredi. Nesıe alýǵa ótinish bergen kezde, siz bankke ózińizdiń kredıttik tarıhyńyzben tanysýǵa ruqsat beretin kelisimge qol qoıasyz. Osylaısha, bank sizdi múldem jańa klıent retinde emes, kerisinshe, tabysyńyz, zeınetaqy jarnalaryńyz, aktıvterińiz jáne basqa da qajetti derekterińiz týraly aqparaty bar adam retinde qarastyra alady», — dep túsindirdi T. Súleımenov Ulttyq bankte ótken baspasóz máslıhatynda.
UB basshysy bankterdegi mundaı protsester burynnan tsıfrlandyrylǵanyn, bul qarjy ınstıtýttaryna nesıe berý kezinde táýekelderdi baǵalaýǵa múmkindik berip otyrǵanyn atap ótti.
- Bankterde bul tetikter áldeqashan tsıfrlandyrylǵan. Nátıjesinde, olar árqaısymyzǵa qatysty táýekeldi anyq kórip otyr. Mundaı múmkindik olarda burynnan bar. Sondyqtan, nesıe alý boıynsha qandaı da bir qosymsha táýekeldi kórip turǵan joqpyn. Biz qarjy júıesin aıtarlyqtaı tıimdi túrde tsıfrlandyryp úlgerdik, — dedi Ulttyq bank tóraǵasy.
Tımýr Súleımenov bankter úshin otbasynyń ál-aýqat deńgeıi boıynsha derekter mańyzdy emes ekenin, óıtkeni olar ózderiniń anaǵurlym jetildirilgen skorıngtik modelderin qoldanatynyn atap ótti.
Árbir bank qaryz alýshylardy baǵalaý tásilin óziniń basym nesıeleý baǵyttaryna (mysaly, tutynýshylyq nesıeler, avtonesıeler nemese bızneske beriletin nesıeler) qaraı derbes aıqyndaıdy. Sondyqtan klıentterge qoıylatyn talaptar ártúrli bolýy múmkin.
Aıta keteıik, Qazaqstanda 2027 jylǵy 1 qańtardan bastap ataýly áleýmettik qoldaýdyń jańa júıesi tolyq kólemde iske qosylady.
Qazaqstanda 212 myńǵa jýyq úı sharýashylyǵy áleýmettik osal sanatqa jatady. Bul eldegi barlyq úı sharýashylyǵynyń shamamen 3%-y jáne áleýmettik baǵalaýdyń E sanatyna jatady. Eńbek jáne halyqty áleýmettik qorǵaý mınıstri Asqarbek Ertaev mundaı otbasylardy anyqtap, olarǵa memlekettik kómek birinshi kezekte kórsetiletinin aıtty.
