Otbasyndaǵy zombylyq: «111» nómiri shuǵyl jeliler qataryna qosyldy
Otbasyndaǵy zorlyq-zombylyq pen balalar men jasóspirimder arasyndaǵy býllıng máselelerine arnalǵan «111» biryńǵaı baılanys ortalyǵy shuǵyl nómirler qataryna engizildi, dep habarlaıdy Kazinform.
Tsıfrlyq damý mınıstri Baǵdat Mýsın, QR Bala quqyqtary jónindegi ýákili Dınara Zákıeva jáne «Amanat» partııasynyń atqarýshy hatshysy Dáýlet Káribek úshjaqty memorandýmge qol qoıdy.
Kelisimge sáıkes, «111» nómiri «101», «102» jáne «103» shuǵyl nómirlerimen qatar biryńǵaı memlekettik baılanys ortalyǵyna aınalyp, árbir azamat úshin táýlik boıy jáne tegin kómek beredi.
Buǵan deıin 16 qazannan bastap turmystyq zorlyq-zombylyq pen býllıng qurbandaryna arnalǵan «111 — «Amanat» biryńǵaı memlekettik baılanys ortalyǵy iske qosylǵanyn jazǵan bolatynbyz.
«Jalpy, «111 – «Amanat» shuǵyl qyzmeti partııa bastamasymen osydan úsh jyl buryn júzege asyp, óziniń ómirsheńdigin dáleldegen joba. Onyń maqsaty turmystyq ótkir máselelerdiń aldyn alý bolatyn. Osy ýaqyt aralyǵynda jyldam jeli 40 myńnan astam otbasylyq-turmystyq zorlyq-zombylyqtan zardap shekken áıelder men balalarǵa keshendi kómek kórsetti.
Ózderińiz jaqsy bilesizder, Memleket basshysy bıylǵy Joldaýynda osy máseleni sheshý úshin biryńǵaı senim telefonyn uıymdastyrýdy jáne zorlyq-zombylyqqa, qysymǵa tap bolǵandarǵa kómek kórsetýge arnalǵan baǵdarlama ázirleýdi tapsyrǵan bolatyn.
Bul memorandým Prezıdent tapsyrmasyn oryndaýdaǵy qadamdardyń biri. Qoǵam ıgiligi úshin partııalyq deńgeıde qyzmet eteken «111 – «Amanat» nómiri endi memlekettik deńgeıde úzdiksiz qyzmet etetin bolady», - dep jazdy D.Zákıeva áleýmettik jelide.
