Otbasyndaǵy janjal: Ózbekstanda áıel eki balasymen birge 8 qabattan sekirip ketti

TAShKENT. KAZINFORM – Qaıǵyly oqıǵa 17 qyrkúıekte Tashkent qalasynyń Almazar aýdanyndaǵy «Olmazor City» turǵyn úı kesheninde bolǵan, dep habarlaıdy Kazinform agenttiginiń menshikti tilshisi.

Bas prokýratýranyń málimetine saı, 24 jastaǵy áıel aldymen eki balasyn tórtinshi qabattan laqtyryp jibergen. Keıin ózi 8-qabatqa kóterilip, terezeden sekirgen. Oqıǵa ornyna dereý jetken dárigerler 1 jáne 3 jastaǵy eki búldirshinniń ómirin aman saqtap qaldy. Al áıel aýrýhanada jan tapsyrdy.

Aldyn-ala tergeý deregine sáıkes, qaıǵyly jaǵdaıǵa qyzǵanyshtan týǵan otbasylyq janjal sebep bolýy múmkin. Atalǵan faktige baılanysty qylmystyq is qozǵalyp, tergeý júrgizilip jatyr.

Buǵan deıin habarlaǵanymyzdaı, Ózbekstanda otbasylyq janjal úshin ajyrasatyndardy tatýlastyrýǵa shekteý qoıylmaq.

Eske salaıyq, byltyr 10 aıda Ózbekstan sottary turmystyq zorlyq-zombylyq qylmystaryn jasaǵan 15 826 adamdy jaýapqa tartty.

Sonymen qatar kóp áıel alýdy nasıhattaǵan jáne adamdy jynysyna baılanysty kemsitken 21 ózbekstandyq jaza arqalady.

Buǵan qosa, byltyrdan bastap Ózbekstanda balaǵa qatysty jasalǵan turmystyq zorlyq-zombylyq úshin jaza engizildi.