Otbasyndaǵy janjal kóbine jasyryn kúıinde qalyp jatady – Bas prokýratýra

Kún saıyn polıtsııaǵa turmystaǵy zorlyq-zombylyq boıynsha 300-ge jýyq habar kelip túsedi. Bul týraly Senatta kámeletke tolmaǵandardyń quqyqtary men zańdy múddeleriniń saqtalýyn qamtamasyz etý taqyrybyndaǵy jıynda QR Bas prokýratýrasy Qoǵamdyq múddelerdi qorǵaý qyzmeti basshysynyń orynbasary Sáken Samet aıtty, dep habarlaıdy Kazinform.

«Bas prokýratýra organdarynyń basym baǵyttarynyń biri – kámeletke tolmaǵandardyń quqyǵyn qorǵaý. Bıyl prokýratýra organdary 900-ge jýyq tekserý men tıisti taldaý jasaldy. Osy baǵytta 2,5 myńnan astam zańdylyqty buzý derekteri anyqtalyp, 1,5 myńnan astam laýazymdy tulǵa tártiptik jaýapkershilikke tartylyp, 1 mln 300 myń kámeletke tolmaǵannyń quqyqtary qorǵaldy», - dedi S. Samet.

Onyń aıtýynsha, jyl basynan beri elimizde 130 myń qylmys tirkelse, sonyń 4,5 myńy kámeletke tolmaǵandarǵa qatysty. Bul rette, balalardyń jeke basyna zııan keltirý, urlaý, múlkine baılanysty qylmystar jáne basqa zańsyz áreketter anyqtaldy.

«Otbasyndaǵy zorlyq-zombylyqtan balalar psıhıkalyq turǵydan da zardap shegip jatady. Bul baǵytta aýqymdy jumystar atqaryldy. Kún saıyn polıtsııaǵa turmystaǵy zorlyq-zombylyq boıynsha 300-ge jýyq habar kelip túsedi. Bıylǵy 11 aıda ákimshilik jaýapkershilikke 58 myń adam, al qylmystyq jazaǵa 819 adam tartyldy. Otbasyndaǵy janjal kóbine jasyryn kúıinde qalyp jatady», - dedi Sáken Samet.